Бәхетле ҡартлыҡ кисереүсе хеҙмәт ветерандары Сәйҙә менән Әхмәҙулла Насиповтар бына инде алтмыш ике йыл тормош һуҡмағынан ҡулға-ҡул тотоноп бергә атлай. Үрге Һаҙ ауылында иң өлгөлө һәм абруйлы ғаилә булараҡ та ауылдаштары уларҙы хөрмәт итә.

Сәйҙә Рәхмәтулла ҡыҙы – Тү­бәнге Һаҙ ауылынан. Бала саҡтан теремек, зирәк булып үҫә ул. Һуғыш осоро балалары бу­лараҡ, уларға бар ауырлыҡтарҙы үҙ ел­кәһендә татырға тура килә. Ишбай ауылында тыуып, буй еткер­гән Әхмәҙулла Насиповҡа кейәүгә сыҡҡас, йәштәр район­дың төрлө ауылдарында эшләй. Элекке осорҙа йәш ғаиләләрҙе колхоз­дың барлыҡ бүлексә­ләре­нә ебә­рер булғандар. Хаҡлы ялға сығыр алдынан улар Үрге Һаҙ ауы­лына килеп төпләнә. Эшһө­йәр, тырыш ветерандарҙың фиҙа­кәр хеҙмәте бихисап Маҡтау ҡағыҙҙары, ҡиммәтле бүләктәр, юбилей миҙалдары менән баһалана.
Ҡыҙғанысҡа ҡаршы, Наси­повтарға бала һөйөүе татырға яҙмай, әммә улар туғандарының балаларын яҡын күрә, уларҙы тәрбиәләргә, белем биреүгә ҡулдарынан килгәнсә ярҙам итә. Изгелеккә изгелек менән яуап бирә улар ҙа: олоғайған көндәрендә инәй-олатайҙарына үҙҙәре ярҙам күрһәтә, хужалыҡ эштәрендә булыша.
– Бер-беребеҙгә кәрәк һәм терәк булып йәшәп ятҡан көнө­бөҙ, ҡыҙым, – ти йор һүҙле Сәйҙә инәй. – Ҡартым менән бергә­лә­шеп донъя көтәбеҙ. Баҡса үҫте­рәбеҙ, тәҙрә төптәрендәге гөлдә­ремде лә ҡарайым. Баш­ҡортса сыҡҡан бөтә гәзит-журналдарҙы алдырабыҙ, почта килһә, бер-беребеҙҙән уҙышып уҡырға то­тонабыҙ. Кешеләр: “Нимәгә ул тик­лем матбуғат баҫмаһы алды­раһығыҙ?” – тип аптырай. Күҙебеҙ күргәндә, яратҡан баҫмаларҙан айырылыу юҡ, – ти хөрмәтле ағинәй.
Бөгөн инде һигеҙенсе тиҫтә­ләрен ваҡлаусы Насиповтар, йәш­лек дәртен, күңел хисен, йөрәк йылыһын юғалтма­йынса, бер-береһенә терәк һәм кәрәк булып йәшәүҙәре менән бәхетле. Юҡҡамы ни халыҡ та, ҡарт­лыҡтағы бәхет – иң ҙурыһы, тимәй бит!