Республика көнө алдынан Шәһит Хоҙайбирҙин исемендәге премия лауреаттарын ҡотлау күркәм йолаға әйләнде. Башҡортостан Хөкүмәте Премьер-
министры урынбаҫары Салауат Сәғитов, Башҡортостан Башлығы исеменән иң-иңдәрҙе ҡотлап, бүләктәр тапшырҙы.

– Журналисҡа иң мөһиме – киң эрудициялы булыу, мәсьә­ләнең айышына төшөнөү тәү шарт, – тине Салауат Тәлғәт улы. – Бөгөнгө тантананың мө­һимлеген телгә алыу ҙа артыҡ. Быйыл Шәһит Хоҙайбирҙиндың тыуыуына 120 йыл тула, киләсәктә Башҡортостандың 100 йыллыҡ юбилейы көтә.
Шул иғтибарға лайыҡ, быйыл бүләкләнеүселәрҙең бары­һы ла гүзәл заттан ине. Мәртәбәле премия 112-се Башҡорт кавалерия дивизияһы командиры Миңлеғәле Шаймо­ратов тураһында быға хәтлем йәмәғәтселеккә билдәле бул­ма­ған факттарҙы эҙләп табып, гәзиттә баҫтырғаны өсөн “Российская газета” хәбәрсеһе Гөл­наз Даниловаға тапшырылды. Шулай уҡ “Киске Өфө” гәзи­тенән Фәүзиә Мөхәмәтшинаға (көн ҡаҙағына һуҡҡан мәсьә­ләләр буйынса аналитик мәҡә­ләләре өсөн) һәм “Башҡортос­тан” телерадиотапшырыуҙар компанияһынан Гүзәл Хәмитоваға (“Следопыт”, “Позывной барс” һәм “Мистический Башкортостан” тигән тапшырыуҙар әҙерләгәне өсөн) уңыш йылмайҙы.
Әйткәндәй, оҙаҡ йылдар “Башҡортостан” республика гәзите хәбәрсеһе булараҡ, Фәүзиә Мөхәмәтшинаның исеме күптәргә яҡшы таныш. “Киске Өфө” гәзитендә эшләү миңә ысын мәғәнәһендә икенсе һулыш бирҙе, бында күркәм ижади мөхит менән осраштым”, – тине Фәүзиә Миҙ­хәт ҡыҙы.