Гармун моңо... Әсәйҙең моңһоу ҡарашы... Атайҙың ғорурлыҡ менән арҡанан ҡағыуы... Дуҫтарҙың ҡыҫып ҡосаҡлауы... Һөйгән ҡыҙыңдың күҙҙәре сыланыуы... Ә алда – яңы донъя... Яңы дуҫтар... Кирза итек... Автомат... Тревога... Марш-бросок...

Быларҙың барыһы ла һәр егеттең яҙмышындағы бер миҙгел. Әрме – тән һәм йән сынығыуы, рухтың нығыныуы, дуҫлыҡ­тың ҡәҙерен белеү, илең һәм халҡың өсөн йәнеңде фиҙа ҡылырға әҙер булыу мәктәбе ул.
Борон-борондан яугирлек даны яулаған башҡорт ир-егеттәре бөгөн дә анттарына тоғро ҡалып, икһеҙ-сикһеҙ диңгеҙҙәрҙә, зәңгәр күктәрҙә, йырып сыҡҡыһыҙ ҡара урмандарҙа, эҫе сүллектәрҙә, һалҡын тундраларҙа ил алдындағы хәрби бурысын намыҫ менән үтәй.
Быйылғы көҙ айҙарында Башҡорт­остандан алты мең егет хәрби хеҙмәткә алына. Ҡоро ер ғәскәрҙәрендә – 3100, Һауа-космос көстәрендә – 230 самаһы, Хәрби-диңгеҙ флотында – 320-нән ашыу, Стратегик тәғәйенләнештәге ракета ғәскәрҙәрендә – 370, Һауа-десант ғәскәрҙәре сафында – 70, Эске ғәскәрҙәрҙә 490 яҡташыбыҙ хеҙмәт итәсәк. Башҡа төр ғәскәрҙәрҙе 1400 самаһы ир-азаматыбыҙ тулыландырасаҡ.
Башҡортостан Республикаһының хәрби комиссары Игорь Харченко әйтеүенсә, яҙ алынмай ҡалған егеттәр иң беренсе сиратта китәсәк. Быйылғы саҡырылыштың бер үҙенсәлеге лә бар: Рәсәй Федерацияһының Милли гвардияһы тулыландырыла башлаясаҡ.
Шулай итеп, егеттәр республиканың йыйылыу пунктынан 20 октябрҙәр тирәһендә оҙон һәм яуаплы юлға сыға. Сәфәрегеҙ имен, юлығыҙ уң булһын, ил азаматтары!