Рәсәйҙең Сүриәләге уңыштарына сит планета технологиялары ярҙам итә, тип шикләнә американдар. Уларҙың фекеренсә, дәүләтебеҙ был илдә ҡулланған ҡоралдарын сит планета вәкилдәре ярҙамында эшләгән. Бындай һығымтаға килеүҙең сәбәбе ябай ғына: Америка радарҙары беҙҙең торпедаларҙы сәпкә эләктерә алмай икән.

Сүриәләге операцияға “күк кешелә­ре”­нең ярҙам итеүе тураһындағы мәҡәләне доктор Престон Джеймс яҙған. Тап ул, Рәсәй ҡоралдарының килеп сығыуы сит планета вәкилдә­ренә бәйле, тип раҫлай. Бынан ике йыл элек “Су-24” самолетының “Дональд Кук” эсминецы өҫтөнән осоп үткәндә караптың радиолокация ҡоролмалары эшлектән сығыуын миҫалға килтерә доктор. Ул саҡта судно офицерҙарының байтағы, ҡоттары осоп, отставкаға китте.
Был фекерҙе Престон Джеймс ҡына әйтмәй, башҡа абруйлы баҫ­малар ҙа күтәреп алды. Улар, Рәсәй ракеталарын баш етмәҫлек ҡора­малдар менән тик алға киткән цивилизация вәкилдәре генә йыһазланды­рырға мөмкин, ти. Йәнәһе, сит планета вәкилдәренең ике төркөмө бар: берәүһе Обаманы күҙәтә, икенсеһе Путинға ярҙам итә.
Төптәнерәк уйлап ҡараһаң, Америка ғалимдары илдәренең Сүриә­ләге уңышһыҙлыҡтарын шулай аҡ­ларға маташа. Шулай ҙа Ватаныбыҙ ҡоралын сит планеталар технология­һы менән тиңләүҙәре ғорурлыҡ тыуҙыра лабаһа! Хәйер, американдар тиҙҙән үҙебеҙҙе лә “күк кешеләре” тип атай башлар әле.