Ауыл хужалығы министрлығының Колонна залында оло тантана үтте. Төрлө район һәм ҡалаларҙан юғары уңышҡа өлгәшкән белгестәргә республика Башлығы Рөстәм Хәмитов дәүләт наградаларын тапшырҙы.
Илебеҙ ғорурлығы булған хеҙмәтсәндәрҙе ҡотлап, Рөстәм Зәки улы:
– Бөгөн һеҙ Рәсәй Федерация­һының һәм Башҡортостан Республи­ка­һының дәүләт наградаларын алаһығыҙ. Барығыҙ ҙа – алдығыҙға оло маҡсаттар ҡуйып, тура юлдан алға ҡыйыу барған үрнәк булыр кешеләр. Һеҙ был исемдәрҙе уңышлы хеҙ­мәтегеҙ менән яуланығыҙ. Беҙ көслө халҡы булған көслө Баш­ҡортостанда йәшәүебеҙ менән бәхетлебеҙ, – тине.
Оло яуаплылыҡ һәм шатлыҡ сатҡыһы менән балҡыған йөҙҙәргә ҡарап һоҡланаһың да, ғорурланаһың да. Лайыҡлы бүләктәр алған ил улдары һәм ҡыҙҙары үҙ сиратында оло ҡыуаныс менән рәхмәт һүҙҙәрен еткерҙе, кисерештәре, уй-фекерҙәре менән бүлеште.
«Йәшлек» гәзитенең баш мөхәрри­ре Артур Хәсән улы Дәүләтбәковҡа «Башҡортостандың атҡаҙанған мат­буғат һәм киң мәғлүмәт хеҙмәткәре» тигән маҡтаулы исем бирелде. Бөгөнгө тантанала бүләкләнгәндәрҙең барыһы ла – иле, халҡы өсөн хеҙмәт иткән шәхестәр, тип билдәләп:
– Был исем – минең өсөн генә түгел, үҙем эшләгән тотош гәзит редакцияһы өсөн дә оло баһа. Ул иңгә алдағы көндәрҙә лә эшкә яуаплы ҡарарға йөкләмә һала, – тине ул.
Изгелек эшлә лә һыуға һал, халыҡ белер, халыҡ белмәһә, балыҡ белер, ти халыҡ мәҡәле. Ҡасандыр юғары маҡсаттар ҡуйып эшкә тотонған һәм үҙ ҡиблаларына тоғро ҡалып, яҡты уй-ниәттәрен тормошҡа ашырған уңғандар хеҙмәт емештәрен йыйҙы. Уларҙың яратып һәм тырышлыҡ һалып башҡарған эштәре, һис шикһеҙ, ошондай баһаға лайыҡ.