Мосолман байрамдарында өҫтәл һыйҙан һығылып тороусан. Уңған хужабикәләр аҙыҡ-түлектең төрлөһөн әҙерләп, яҡындарына, ҡунаҡтарға ҙур ҡәҙер-хөрмәт күрһәтергә тырыша.
Милли ризыҡтарыбыҙ араһында бауырһаҡтың үҙ урыны бар. Ул борон-борондан бәхет, ҡояш билдәһе тип һаналған. Был ризыҡ менән иң ҡәҙерле кешеләрҙе һыйлағандар.


Бауырһаҡты әҙерләү өсөн ике аш ҡалағы шәкәр, биш-алты грамм ҡоро сүпрә, ике аш ҡалағы маргарин, 400 грамм он, ике стакан йылы һөт, бер сәй ҡалағы тоҙ, таҙартылған көнбағыш майы (ҡамырға – ике аш ҡалағы, ҡыҙҙырыу өсөн – 800 мл) кәрәк.
Йылы һөткә сүпрәне, шәкәрҙе һәм тоҙҙо һалып болғап, 15 минутҡа ултыртып торабыҙ. Унан шы­йыҡсаға йомшартылған маргарин, он ҡушып, ҡамыр баҫабыҙ. Әҙер булғас, ике аш ҡалағы көнбағыш майы ҡушып, йәнә һәйбәт итеп иҙергә кәрәк. Аҙаҡ ҡамырҙы йылы урынға 40 – 45 минутҡа ҡаплап ултыртып тора­быҙ. Ул ике тапҡыр ҡалҡып сығырға тейеш. Шунан һуң бәлә­кәйерәк өлөшөн бүлеп алабыҙ ҙа тултырмаға оҡшатып әүәләй­беҙ. Унан әстрхан сәтләүеге ҙурлы­ғындағы киҫәк­тәр ҡырҡып алып, түңәрәктәр яһайбыҙ.
Артабан ҡаҙанда уртаса ҡыҙыу­лыҡта май ҡайнатыла. Уға 12 – 15 (ҡаҙандың ҙурлы­ғы­на ҡарап) бауыр­һаҡты бер юлы һалып, туҡтауһыҙ болғап беше­рергә кәрәк. Артыҡ майын һөртөп алыу өсөн әҙер ризыҡты тәүҙә ҡағыҙ таҫта­малға һалып тороу һәйбәт булыр. Унан бауырһаҡтар “тау”ға өйөлә, өҫтөнә шәкәр онтағы һибелә.