Башҡорт асыҡ КВН лигаһы йәштәре Мостай Кәрим исемендәге Милли йәштәр театрында шаяндар һәм отҡорҙар фестиваленең сираттағы уйынын ойошторҙо. Ул Рәсәй киноһы йылына арналды.

“Йәйге кубок-2016” тип аталған I тө­бәк-ара башҡорт КВН-ы уйынында еңеү яулау өсөн өс команда һынау тотто: Сибай ҡала­һынан “Еңмештәр”, Бөрө ҡала­һынан “Ҡол-Дәүләт малайы” һәм Ҡаҙағстандан килгән ҡунаҡтар – “ҠАҘИИТУ” командаһы.
Һәр команда үҙенсә­лекле ине. Сибай ҡалаһы “Еңмештәр”е башҡортса шаяндар һәм отҡорҙар уйынын яратҡан аудиторияға яҡшы та­ныш. Уларҙың шаян сы­ғыштарын Урал аръяғында ғына түгел, башҡа төбәктәрҙә лә яратып ҡарайҙар. Бер миҙгел ял итеп алғандан һуң, егеттәр яңы көс менән киләһе үрҙәргә ынтыла.
Ә бына Бөрө районынан Рәсүл Ҡолдәүләтов бер үҙе бер команда булараҡ сығыш яһаны. Шаяндар һәм отҡорҙар уйынында Рәсүл бишенсе йыл рәттән ҡатнаша. Һуңғы арала бик популяр булып киткән “Stand up” форматы күптәргә оҡшай. Әйтә­йек, яңғыҙың тотош залдың иғтибарын яулап тота белеү еңелдәрҙән түгел. Шулай бу­лыуға ҡарамаҫтан, бер кешенән торған командалар күбәйә бара.
Ҡаҙағстан командаһының башҡорт сәхнәһендәге тәүге сығышы күптәрҙе таң ҡал­дырҙы. Тамашасылар туған­даш халыҡ вәкил­дәренең үҙ телендә шаяртыуын тәрже­мә­сеһеҙ ҙә аңланы. “ҠА­ҘИ­ИТУ”, йәғни Ҡаҙағс­тан мәғлүмәт техноло­гиялары идаралығы институты йәш­тәрен Өфө тамашасыһы йылы ҡабул итте.
Командалар һаны аҙ булыуға ҡара­маҫтан, тамашасылар рәхәт­ләнеп көлдө. Башҡорт асыҡ КВН лигаһы йәштәре Башҡорт­остандың Йәштәр сәйәсәте һәм спорт министрлығы менән бер­лектә уҙғар­ған сара өфөләрҙең йәйге эҫе бер кисен үҙенсә йәмләне, Матбуғат һабан­туйын­да ҡатнашҡандар өсөн яҡшы ял булды.
Башҡорт асыҡ КВН лига­һының йәйге кубогы туған­даш республика вәкил­дәренә күсте. Тамашасылар быны бер тауыштан хупланы. Мә­ғариф һабантуйы сиктәрендә ойошторолған шаяндар һәм отҡорҙар уйынында тәүге тапҡыр силәбеләр ҙә сығыш яһаны.
Күптән үҙенсәлекле үҫеш юлы алған Башҡорт КВН-ы йылдан-йыл яңы асыш­тарға өлгәшә. Ҡуйған маҡсат­тарына хыянат итмәй, тоғро ҡалыуҙары һәм уға ҡа­рай ҡыйыу барыуҙары һоҡлан­дыра. Ә ошолай ойош­торолған саралар башҡорт йәштәрен берләштереүгә, бер-береһе менән таныштырыуға оло йоғонто яһай.