Республикала Дәүләт Думаһына депутатлыҡҡа ҡайһы бер кандидаттар банк иҫәбе һәм мөлкәт тураһындағы мәғлүмәттәрен күрһәтергә “онотҡан”. Сәйәси партияларҙың вәкилдәре менән осрашыуҙа Башҡортостандың Үҙәк һайлау комиссияһы рәйесе урынбаҫары Наилә Алтынова ошондай мәғлүмәтте еткерҙе.

Уның әйтеүенсә, кандидат­тар­ҙың барыһы ла иҫәптәре һәм мөл­кәте тураһында хәбәр иткән. Тикшереү барышында ҡайһы берәүҙәрҙең автомобилен, банк­тағы иҫәбен күрһәтмәүе асыҡ­ланған. Кандидаттарҙың берәүһе суд хөкөмөнә тарттырылыуы ха­ҡында белдермәгән. Һөҙөмтәлә уның теркәлеүе ғәмәлдән сыға­рылған. Бер нисә кандидаттың ки­леме, мөлкәте һәм белеме буйынса мәғлүмәттәрендә айыр­малыҡтар бар.
Наилә Алтынова осрашыуҙа махсус иҫәптәргә бәйле хәл тураһында ла һөйләне.
– 22 авгусҡа ҡарата канди­дат­тарҙың 60 махсус һайлау иҫәбе асылған. Шуларҙың 31-ен­дә аҡса бар, ҡалғандары уны тотоноп бөт­кән йәки аҡсаны бөтөн­ләй һалмаған. Финансһыҙ агитация кам­панияһын алып барыу ҡы­йынға төшәсәк, сөнки закон буйынса баҫма продукция һайлау фонды аҡсаһына сығарыла, – тине ул.
Кандидаттарҙың махсус иҫәп­тәренә 39 миллион һум аҡса ин­дерелгән, шуның 840 меңе (2 проценты) – граждандарҙың, 16 миллионы (40 проценты) – ойошмаларҙың иғәнәләре, 11 миллионы (29 проценты) – кандидаттарҙың, 9 миллионы (25 проценты) кандидатты күрһәткән сәйәси партияларҙың аҡсаһы. Уларҙың барыһы ла округ һайлау комиссияларының Контроль-ревизия хеҙмәте тарафынан күҙәтелә.