Илебеҙҙә табиптар һәм шәфҡәт туташтарына ҡытлыҡ арта бара. Айырыуса махсуслашҡан белгестәргә – неврологтарға, диетологтарға, офтальмологтарға һәм логопедтарға – мохтажлыҡ ҙур. Ни өсөн?

Ә бит, уйлап ҡараһаң, дәүләт ҡаҙнаһы медицина ихтыяждарына аҡсаны мөмкин тиклем күберәк бүлергә тырыша. Былтыр, мәҫәлән, һаулыҡ һаҡлау өлкәһенә Башҡортостанда 53 миллиард һум бирелгән. “Әйтегеҙ әле – беҙҙең республикала шул хәтлем ресурс йүнәлтелгән тағы ла берәй тармаҡ бармы икән?” – тигәйне республика Башлығы Рөстәм Хәмитов Өфөләге медицина форумында сығыш яһап.
Шулай ҙа табиптарға ҡытлыҡ ҙур, һәм ошо сәбәпле поликли­ни­каларҙа сират барлыҡҡа килә. Махсуслашҡан белгестәргә байтаҡ ваҡытҡа алдан яҙылып ҡына инергә мөмкин. Был хәл айырыуса Өфө менән Стәрле­тамаҡҡа хас. Бигерәк тә шәфҡәт туташтары етешмәй һәм уның сәбәптәре сер түгел: хеҙмәт хаҡы үтә аҙ һәм эш шарттары ауыр – смена барышында (көндөҙ ҙә, төнөн дә) гел аяҡ өҫтөндә булырға кәрәк, сирлеләр араһында төрлө кеше осрай, һәр дауалау процеду­раһы өсөн яуап бирәһең...
Рәсәйҙә бөгөн 40 меңгә яҡын табип һәм 270 мең (!) шәфҡәт туташы урындары буш тора. Өфөлә быйыл яҙ үткәрелгән вакансиялар йәрминкәһе күрһәте­үенсә, Башҡортостанда 2,5 мең табип етешмәй. Был сарала район һәм ҡала дауаханала­рының баш табиптары медицина университетын тамамларға йыйынған йәштәр менән дә осрашты, уларҙы үҙ дауаханаларына эшкә килергә өгөтләне. Әйткәндәй, ошо университет быйыл ғына ла 500 белгес әҙерләп сығарҙы. Тимәк, табип һөнәре алып сыҡҡан егет һәм ҡыҙҙарыбыҙ етерлек. Тик улар ҡайҙа? Быныһы инде икенсе мәсьәлә.