Уҡытыусыларҙың август кәңәшмәһе барышында 20-нән ашыу Дәүләт Йыйылышы — Ҡоролтай депутаты үҙҙәренең һайлау округтарында конференцияларҙа ҡатнаша. Парламентарийҙар Дәүләт Йыйылышы — Ҡоролтайҙың мәғариф өлкәһен закондар менән тәьмин итеү йүнәлешендә алып барған эше хаҡында һөйләйәсәк.

Август кәңәшмәһе төбәктәге уҡыу йорттары етәкселәрен, власть органдары вәкилдәрен, ғалимдарҙы Өфөгә йыясаҡ. Улар башҡарылған эшкә йомғаҡ яһап, киләһе уҡыу йылына бурыстар билдәләйәсәк. Артабан мәғариф өлкәһенә ҡағылышлы көнүҙәк мәсьәләләр район һәм ҡалаларҙа ла өйрәнеләсәк. Быйыл кәңәшмә өс көн дауам итә. Һәр көн билдәле бер темаға арналып, уның буйынса дискуссия майҙансыҡ­тарында, оҫталыҡ дәрестәрендә фекер алышыу ойоштороласаҡ.
Дәүләт Йыйылышы — Ҡоролтай Рәйесе Константин Толкачев әйтеүенсә, тәҡдим ителгән эш алымы урын­дарҙағы хәлде баһалау, күтәрелгән мәсьәләләрҙе ентеклерәк тикшереү мөм­кинлеген бирә.
— Һуңғы йылдарҙа инклюзив белем биреүҙе үҫтереүгә, һаулыҡ мөмкинлектәре сикләнгән кешеләр өсөн уҡыу йорттарында уңай­лыҡтарҙы арттырыуға, мәктәптә туҡла­ныуҙы ойоштороуға, белем усаҡтарын техник йыһаз­ландырыуға иғтибар бирҙек. Мәктәптәрҙең, балалар баҡса­ларының инфра­структураһы тамырынан яңырҙы, — тине республика парламенты Рәйесе. — Мәғариф систе­маһында уҡытыуҙың сифатын күтәреүҙең мөһим шарты — уҡытыусыларҙың һәм мәк­тәптәрҙең инициатива күрһәтеүе, ирекле эш итеүе. Беҙгә үҙенсәлекле идеялар тәҡдим иткән новатор уҡытыусылар менән ғорур­ланырға, уларға һәр йәһәттән булышлыҡ күрһәтергә кәрәк. Әлеге педагогик форум мәғариф өлкәһендәге эш сифатын яҡшыртыуға өҫтәмә этәргес бирәсәк, әлбиттә.