Мөләйем йөҙөнән йылмайыу китмәгән был ҡатынды Асҡарҙа белмәгән кеше һирәктер. Дилә Хәлфетдин ҡыҙы Суфийәнова 36 йыл ғүмерен почта хеҙмәтенә арнаған, һуңғы ике йылда ул “Тамъян” ҡулланыусылар йәмғиәтендә эшләй.

– Хаҡлы ялға ике йыл ғына ҡалғас, эшемде алмаштырыуымды белеп аптыраусылар күп булды. Ә минең икенсе урында үҙемде һынап ҡарағым килде, – ти Дилә Хәлфетдин ҡыҙы.
Эшһөйәр, тырыш кешенең ҡулынан килмәгән эш буламы ни?! Бында ла Дилә Суфийәнова үҙенең бурыстарына яуаплы ҡарауы, эш өсөн янып тороуы арҡаһында тиҙ арала коллегаларының, етәксе­лектең ихтирамын яулай.
Үҙенең тормош һәм хеҙмәт юлындағы ҡаҙаныштары өсөн Дилә Хәлфетдин ҡыҙы ата-әсәһенә рәхмәтле. Юлдаш ауылынан Факиһа Хәлим ҡыҙы менән Хәлфетдин Заһретдин улы Ғафаровтарҙың һигеҙ балалы ғаиләһендә алтынсы булып донъяға килгән ул. Ҙур ғаиләне аҫрау өсөн эштән бушамаған ата-әсәһенең ҡул араһына иртә инә. Бишенсе клас­тан һуң каникул һайын урындағы колхоз өсөн миндек бәйләргә, бакуйҙарҙы әйләндерергә йөрөй.
– Бәләкәйҙән эшкә өйрәнеп, үҙаллы булып үҫтек. Атай һуғышта 112-се Башҡорт кавалерияһы сафында яу юлын үткән яугир булараҡ беҙҙе тормош ауырлыҡтарынан ҡурҡмаҫҡа, көслө, сая булырға өйрәтте. Әсәй ғаилә, өй йылыһы ҡатын-ҡыҙҙан, хужабикәнән икәнлеген аңлатып, донъя көткәндә кәрәккән һөнәрҙәргә төшөндөрҙө, – ти алыҫ бала саҡ йылдарына урап ҡайтып Дилә апай.
Асҡарҙа ун йыллыҡ мәктәпте тамамлағас, ул почтаға эшкә килә. Урынлашҡан ыңғайы, оҙаҡҡа түгел, баш-күҙ алырмын да китермен, тип уйлай. Көн артынан ай үтеп, тынғыһыҙ хеҙмәттә 40 йылға яҡын ғүмере уҙып киткәнен һиҙмәй ҙә ҡала.
– Мин эшкә килгәндә, почтаға Зинит Зәйнуллин етәкселек итә ине. Почтальон булып оҙаҡ та эшлә­мәнем, бригадир итеп ҡуйҙылар. Бер юлы профсоюз эшен дә алып барҙым. Нисек өлгөргәнмендер ул?! Почтаны сортҡа айырыу эше лә еңелдән булманы. Элек гәзит-журнал һәр өйгә кәмендә өс-биш баҫма килә торғайны, хаттар ҙа күп булды. Меңләгән посылка тауҙай өйөлә торғайны. Иртәнге сәғәт дүрттә эшкә килеп, шуларҙы айырып һалам. Сәғәт һигеҙгә адресаттарға тәғә­йенләп бүлеп бөтәм. Ә өйҙә – береһенән-береһе бәләкәй өс бала. Балалар баҡсаһына урын юҡ, йәнәһе, өйҙә уларҙы ҡарарға кеше бар – йәмәғәтемдең өләсәһе менән бергә йәшәйбеҙ. Ул үҙе оло йәштә, беҙҙең ҡарауға мохтаж, – тип иҫләй Дилә Хәлфетдин ҡыҙы. – Тағы бер осраҡ хәтеремдә ҡалған. Етәксе булып Гөлсөм Саҙрисламова эшләй ине. Мин таңғы сәғәт 4-тә эшкә килдем, Гөлсөм Ҡотдос ҡыҙы Өфөгә сыҡты. Сәғәт киске 11 булған, етәксе әйләнеп ҡайтып төштө, ә мин һаман почтала, эшемде теүәлләйем. Мине әрләп тигәндәй ҡайтарып ебәрҙе. Эшең алға барһын тиһәң, ваҡыт менән иҫәпләшмәҫкә кәрәк.
Уҙған быуаттың 90-сы йылдарында Дилә Суфийәнова район Советы депутаты итеп һайлана. Бындай оло ышаныс тик абруйлы, булдыҡлы кешеләргә генә күрһәтелә. Дилә Хәлфетдин ҡыҙы һайлаусыларының ышанысын аҡлай. “Тыныслыҡ” урамына асфальт һалына, урам байрамдары уҙғарыла.
– Бөтә эшемде хуплап, ярҙам итеп торған тормош иптәшем Мөхәмәт Мәхмүт улы миңә ныҡлы терәк-таяныс булды, – ти Дилә апай, 37 йыл бер һүҙҙән булып, татыу йәшәгән ире хаҡында. – Балалар ҙа почта эшенең нескәлектәрен белеп, ярҙамлашып үҫте.
2006 йылда почта хеҙмәтен үҙгәртеп ҡорғандан һуң, Дилә Хәлфетдин ҡыҙы киоскыға урынлаша һәм унда ла 10 йыл эшләй. Бөгөн ул – почта элемтәһе ветераны, күп тапҡыр УФПС-тың, райондың Почет грамоталары менән наградланған.
Әммә уның иң ҙур ғорурлығы – балалары. Рәсимә Сибай медицина училищеһын тамамлап, Асҡар урта мәктәбендә фельдшер булып эшләй. Ике ҡыҙ үҫтерә. Дилара – Магнитогорск ҡалаһында ашнаҡсы. Ул да ҡыҙ тәрбиәләй. Әнүр – билдәле стилист-визажист, парикмахер. Ю. Ша­рыгинаның матурлыҡ акаде­мия­һында уҡыта. Рәсәй кимәлендәге төрлө конкурстарҙа, асыҡ чемпио­наттарҙа күп тапҡыр еңеүҙәр яулаған.
Дилә менән Мөхәмәт Суфи­йәновтарҙың ҙур, матур йорттарынан кеше өҙөлмәй. Ҡот бөркөлөп торған яҡты, йылы өйҙә туғандар, дуҫтар – һәр саҡ көтөп алынған ҡунаҡ. Яҡындарына иғтибарын, көсөн йәлләмәй, уларға һәр саҡ терәк булып, тормоштан һәм эштән йәм табып йәшәй Дилә Хәлфетдин ҡыҙы.