Рөстәм ХӘМИТОВ,
Баш­ҡортостан Рес­пуб­ликаһы Баш­лығы:
— Республика халҡы өсөн был — тарихи да­та. Бер нисә йыл элек Рә­сәй Хөкүмәтенә әлеге юбилейҙы юғары дәрә­жәлә үткәреү тура­һын­да тәҡдим индер­гәйнек. Хөкүмәт уны хупланы һәм байрамды ил кимәлендә билдәләү инициативаһы менән Рәсәй Президентына сыҡты. Ғөмүмән, рес­публиканың йөҙ йыл дауамында илдең ышаныслы, ныҡлы төбәге булыуы беҙҙең өсөн мөһим. Ил Президентына рәхмәт. Владимир Путин башланғысыбыҙҙы хуп­ланы.

Константин ТОЛКАЧЕВ, Дәүләт Йы­йы­­лышы – Ҡоролтай Рәйесе:
— 1919 йылдың 20 мартында Үҙәк совет власы менән төҙөлгән килешеү – илдәге федератив ҡоролошҡа башланғыс һалған ни­геҙ ташы ул. Нәҡ ошо ҡарар һөҙөм­тәһендә республиканың дәүләт-хоҡуҡи статусы юридик яҡтан нығытыла. Иң мө­һиме, Башҡортостандың тәжрибәһе күп­селек этностарға үрнәк булып тора — башҡалар ҙа үҙ хоҡуҡтарын ошо рәүешле нығытып ҡуйырға ынтыла. Шуны ла билдәләү мөһим: тап ошо алым нигеҙендә Рәсәйҙә йәшәгән күп милләтле халыҡтар глобализация осоронда үҙҙәренең үҙенсәлеген һаҡлауға өлгәшкән.

Лилиә ҒҮМӘРОВА, Федерация Советының Фән, мәғариф һәм мәҙәниәт комитеты рәйесенең беренсе урынбаҫары, Башҡортостандан сенатор:
— Был Указды әҙерләү алдынан етди һәм ентекле эш атҡарылды.
Бынан өс йыл элек Башҡортостан Баш­лығы Рөстәм Хәмитов Башҡортос­тандың күп милләтле халҡы исеменән Рәсәй Президентына юбилей саралары үткәреү тәҡдиме менән сыҡты. Рәсәй Хөкүмәтендә был мәсьәләне тәфсирләп өйрәнделәр. Башланғыс яҡлау тапты. Указ һәм 2019 йылда үткәреләсәк саралар Башҡортостан менән Рәсәй үҫеше тарихына яңы этәргес буласаҡ.
Республика юбилейға иҡтисад, фән һәм мәҙәниәт өлкәләрендә ҙур ҡаҙа­ныштар менән аяҡ баҫа. Һуңғы йылдарҙа төбәк Рәсәй һәм донъя кимәлендә үткәрелгән халыҡ-ара саралар үҙәге булып торҙо. Быларҙың бөтәһе лә — ҙур яуаплылыҡ талап иткән эш һөҙөмтәһе. Иң мөһиме, юбилей сараларына яңы проекттар, фәнни-техник ҡаҙаныштар менән киләбеҙ – Башҡортостандың күпселек өлкәләрҙәге уңыштары бөгөн Рәсәйҙең башҡа төбәктәре тарафынан өйрәнелә һәм уңышлы ҡулланыла.

Зөһрә РӘХМӘ­ТУЛ­ЛИНА, РФ Дәүләт Ду­маһы депутаты, Баш­ҡортостан ха­лыҡ­тары ассамблеяһы рәйесе:
— Башҡорт атлы­ларының 1612 йылда Мәскәү өсөн барған алыштарҙа Минин һәм Пожарский етәкселеге аҫтында һуғышыуы, 1812 йылғы Ватан һуғышында “Төньяҡ Амурҙары” күрһәткән батыр­лыҡтар – былар барыһы ла башҡа халыҡ­тар менән бер рәттән Ватанын яҡлап күтәрелгән башҡорттарҙың хәрби йылъяҙмаһы ул. 1941 – 1945 йылдарҙағы Бөйөк Ватан һуғышына Башҡортостан фронтҡа 700 меңдән ашыу хәрбиҙе оҙата, уларҙың 300 меңе яу яланында ятып ҡала, 278 яугир Советтар Союзы Геройы исеме ала. Бына инде биш быуат дауамында күп милләтле республика халҡы иңгә-иң терәшеп төрлө тармаҡ хужалыҡ­тарын үҫтерә, мәҙәниәтте һаҡлай, төбәктең данлы тарихын яҙа. Тап ошо берҙәмлек бөтөн Рәсәйгә Башҡортос­танды милләт-ара татыулыҡ, конфессия-ара хеҙмәттәшлек өлгөһө итеп танытты.
Бөгөнгө Башҡортостан – илдең тото­роҡло һәм әүҙем үҫешкән төбәктәренең береһе ул. Республикала алып барылған социаль-иҡтисади һәм милли-мәҙәни сәйәсәт ыңғай һөҙөмтә бирә, тап ошо арҡала Рәсәйҙе халыҡ-ара кимәлдә күрһәтеүгә өлгәштек. Үткән йәй Өфөлә ШОС һәм БРИКС саммиттары үтте, 2020 йылда Бөтөн донъя фольклориадаһы ла беҙҙә ойоштороласаҡ.
Башҡортостандың 100 йыллығын билдәләү – юбилей датаһын федераль кимәлдә үткәреү генә түгел, ә һәр власть органының, социаль институттарҙың, һәр ватандашыбыҙҙың яуаплылығы ул. Республикаға ошо дата айҡанлы бихисап сит ил ҡунаҡтары, ситтә йәшәгән башҡорт диаспоралары вәкилдәре киләсәк. Уларҙы лайыҡлы ҡаршылау һәм төп йортобоҙҙоң асыҡ, яҡты, тыныс икәнен күрһәтеү һәр ҡайһыбыҙҙың изге бурысы булып тора.

Рөстәм ИШМӨ­ХӘ­МӘТОВ, РФ Дәүләт Думаһы депутаты:
— Баш­ҡортостан­дың ойошторолоуына йөҙ йыл – халҡыбыҙ тарихында был бик мө­һим ваҡиға. Иҫтәлек­ле дата тарихты бар­лауҙы, үткән­дәргә йомғаҡ яһау­ҙы талап итә. Шуға күрә байрам айҡанлы мәҙәни саралар ғына түгел, ә федераль кимәлдә лә фәнни-ғәмәли конференциялар, “түңәрәк өҫтәл”дәр үткәрелеүен хуп күрәм. Башҡортостан Рәсәйҙең сәйәси һәм иҡтисади картаһында мөһим, ныҡлы урынды биләй. Киләсәктә лә шулай булып ҡаласағына ышанам.

Әмир ИШЕМ­ҒО­ЛОВ, БР Дәүләт Йыйылышы – Ҡоролтай депутаты, Бөтә донъя баш­­ҡорт­тары ҡо­ролтайының Баш­ҡарма коми­теты рәйесе:
— БАССР-ҙы төҙөү — автономия ойош­то­роуҙың тәүге тәжри­бә­һе, һәм ул ваҡы­тында баш­ҡа республикалар тарафынан киң ҡулла­ныла. Башҡорт автономиялы рес­публикаһы етәкселәре федерализм идеялары яҡлы сығыш яһай, тап шуға ла БАССР-ҙы булдырыу Рәсәй феде­ра­лиз­мының нигеҙен тәшкил итә лә инде. Был — күп милләтле илдә милли мәсьәләләрҙе хәл итеүҙең иң сағыу өлгөһө.
Бөгөн Башҡортостан Республикаһы – Рәсәй Федерацияһы составында әүҙем эшмәкәрлек алып барған дәүләт берәмеге. Сәнәғәт, төҙөлөш, ауыл хужалығы, фән һәм мәҙәниәт өлкәһендәге уңыштарыбыҙ киң билдәле. Башҡортостан Республи­каһы ойошторолоуға 100 йыл тулыу айҡанлы үткәреләсәк саралар Рәсәй халыҡтары араһында дуҫлыҡты һәм хеҙмәттәшлекте нығытыуға, күп милләтле илебеҙҙең артабан сәскә атыуына булышлыҡ итер тип ышанам.