Бына йәмле, ҡояшлы йәй ҙә етте. Бала саҡтан хәтеремдә был осорҙоң иң сағыу, иҫтәлекле мәле булып һабантуй тора. Нисәмә йыл үтһә лә, йыр-моң, уйындар тулы ялан — күңел түремдә.

Шуға күрә үҙем эшләгән балалар баҡсаһында ла, яҙғы баҫыу эштәре бөткәненә арнап Балалар һабантуйы үткәрергә булдым. Алена Мисюкова менән уның сценарийын әҙерләнек. Балалар баҡ­саһының урамында Ерһылыу менән Йәйһылыу балалар менән ат сабышы, уңған ҡыҙҙарҙың һыу ташыу ярышы, баһадирҙар кө­рә­ше, бағанаға менеү, ҡалаҡ ме­нән йомортҡа ташыу һәм башҡа ҡыҙыҡлы уйындар үткәрҙе. Ҡат­нашыусылар — дүрт төркөм балалары. Башҡалар ҙа буш ҡал­маны: тоҡ кейеп йүгереүҙә ҡатнаштылар.
Уйындар араһында музыкаль сығыш­тар ҙа әҙерләнек. Мәҫәлән, Ҡар кеше­һенең бейеүен — Тимур тигән егет, башҡорт милли кейе­мендә “Сәскә” бейеүен ҡыҙҙар баш­ҡарҙы, Башҡорт­остан тура­һында шиғырҙар ҙа һөйлә­неләр. Тәрбиәселәр ҙә, күҙҙәрен яулыҡ менән бәйләп, уйында ҡатнашты.
Әлбиттә, еңеүселәр бүләк­ләнмәй ҡалманы. Бағанаға менә алған ике егетебеҙ “ҡаҙ”лы булды. Приз уйынсыҡ ҡына булһа ла, ярыш уйын түгел ине. Һа­бантуйҙың йәме булған көрәште беҙҙең егеттәр ҡул менән ерҙән күтәрелеү ярышына алыштырҙы. Иң көслө дүрт егетебеҙ “бәрәс”ле булды. Күҙҙәре ҡыуаныс һәм ғорурлыҡ менән тулы ине уларҙың. Уңған ҡыҙҙар ярышында еңгәндәр ҙә үҙенсәлекле бү­ләктәр алды. Сәсәндәр ярышында шиғыр һөйләгән бәләкәстәргә китап тапшырылды. Ҡалған ҡунаҡтарға татлы әтәстәр таратылды. Бөтәһенә лә етте иҫтә­лекле бүләктәр.
Һабантуйҙың башынан аҙағы­наса башҡорт көйҙәре яңғыраны. Ул йыр-моңдо балалар баҡса­һын­да эшләүсе музыка етәк­се­ләре Галина Ғилмет­динова, Элина Әхмәрова менән физкультура етәксеһе Татьяна Кудрявцева әҙерләне. Мин – Ерһылыу, Алена Мисюкова Йәйһылыу булды.
Һабантуйыбыҙ бик уңышлы килеп сыҡты. Маҡсаттарыбыҙға өлгәштек. Беренсенән, бала­ларҙы башҡорт халҡы­ның йолалары менән таныштырҙыҡ. Ҡала мөхитендә был бик мөһим. Икен­сенән, бәләкәстәрҙең әхлаҡи-патриотик тойғоларын үҫтереү, улар­ҙың күңелен күтәреү маҡсатын ҡуйғайныҡ. Милли мәҙәниәткә һөйөү ошо йәштән башлана бит. Балаларыбыҙ бик шатланып, хис-тойғо тулы күңел менән өйҙәренә йүнәлде.