Бер төркөм турист Ирәмәлгә ҡырағай сәфәр ойошторған. 11-12 июндә улар Башҡортостандың айырыуса һаҡланған тәбиғәт биләмәһенә квадроциклдарҙа менгән. Тауҙағы йылға һикәлтәләре лә, ҙур таштар ҙа, ҡуйы урман да туҡтата алмаған уларҙы.


“Саҡырылмаған ҡунаҡтар” ағастарҙы ҡырҡыуҙан да тартынып тормаған. Үҙҙәренең башҡарған эштәрен видео­камераға төшөрөп, Интернет селтәренә лә һалғандар. Закон алдындағы яуаплылыҡ тураһында онотҡандар, күрәһең.
Татарстан туристарының һәүәҫкәр видеояҙмаһы киң мәғлүмәт саралары хеҙ­мәт­кәрҙәренең иғтибарын йәлеп итеп кенә ҡалманы, беҙҙең депутаттарҙың һәм эколог­тарҙың да ҙур ризаһыҙлығын тыу­ҙыр­ҙы. Әлеге осраҡ буйынса прокуратура тикшереү башланы. Кисә төрлө власть һәм хоҡуҡ һаҡлау органдары белгес­тәренән торған эксперт төркөмө “Ирәмәл” тәбиғәт паркына юлланған. Комиссия экстремалдарҙың тауға ҡайһы биләмә аша үтеүен һәм үҫемлектәргә ниндәй зыян килтереүен асыҡла­ясаҡ.
Ҡыҙғанысҡа ҡаршы, данлыҡлы тауға еңел генә күтәрелергә теләүселәр осрап тора. 1965 йылдан бирле тәбиғәт ҡомартҡыһы тип иҫәпләнгән Ирәмәлгә 2010 йылдың октябрендә Магнитогорск ҡалаһының «Шүрә­ле» клубы ағзалары алты джип менән барып менгәйне. Был хәлдән һуң, Башҡорт­остан етәксеһе Рөстәм Хәмитовтың махсус бойоро­ғона ярашлы, ҡәтғи саралар күрелде.
“Изге Ирәмәл тауына ойошторолған автомобиль “экскурсия”һына ҡарата асыуым сикһеҙ. Уларҙың һаҡ­лауға мохтаж булған уникаль тәбиғәт ҡосағына машиналар менән үтеп инеп, күңел асыуын, ағастарҙы киҫеп юл һалыуын ысын вәхшилек тип иҫәпләйем. Республиканың тәбиғәтте һаҡлау буйынса вәкәләтле органдарына бындай турис­тарҙың ҡылыҡта­рын баһа­лап, етди саралар күрергә кәрәк. Мин, республика етәксеһе булараҡ, ҡала һәм район хакимиәттәре баш­лыҡтарынан айырыуса һаҡ­ланыусы тәбиғәт биләмә­ләренә ҡарата бындай мөнәсәбәткә юл ҡуймауҙы һәм һәр етәксенән изге урындарыбыҙҙы ҡәҙер­ләүҙе ҡәтғи талап итәсәкмен”, – тигәйне ул саҡта Рөстәм Зәки улы. Тиҙ арала «Ирәмәл» тәбиғәт паркын булдырыу тураһында документҡа ҡул ҡуйылды.
Ирәмәлдең халҡыбыҙ өсөн изге тау икәнлеген белә тороп та, күрше төбәк вәкилдәренең вәхшиҙәрсә ҡыланыуын аңлауы ауыр...