Кемдеңдер тырыш хеҙмәт, ижад емеше булғанды юҡ итергә тырышыуҙы көсһөҙлөккә, бәғерһеҙлеккә тиңләргә мөмкиндер. Ә инде республика, халыҡ мәнфәғәтендә эшләнгәнде ҡыйратыу, зыян килтереү – бөтөнләй кешелекһеҙлек билдәһе.

Өфөнөң Дим биҫтәһен­дәге бер фонтан уртаһында көршәк тотҡан ҡыҙ һыны ҡолатып төшөрөлдө, Дәү­ләт циркы алдындағы клоун Карандаш тотоп торған таяҡ һындырылды, Салауат Юлаев проспектында сәскә үҫтерелгән арба емерелде, Комсомол һәм Лесотехникум урамдары киҫелешен­дәге атлы егет һыны таш менән бәргеләнде...
Баш ҡаланың тышҡы йөҙөн күркәмләндереү, тарихи үткәнде сағылдырыу маҡсатында төрлө һындар, ҡоролмалар әүҙем урынлаштырыла. Әммә бер нисә көн элек кенә ошолай дүрт һәйкәлде емереү, зыянлау осраҡтарын күреп, һүҙһеҙ ҡалаһың. “Илһөйәрлек”, “рух” төшөнсәләре – ике һүҙебеҙҙең береһендә. Әммә улар ысынбарлыҡта Рәсәйҙең, Башҡортос­тан­дың берәй спорт коман­даһы еңеү яулағанда биткә әләм һүрәте төшөрөп, эскән килеш байраҡ итеп күтәреп ҡысҡырып йөрөү менән ге­нә сикләнмәһен ине. Иң тәү­ҙә үҙең йәшәгән урам­дың, ҡаланың төҙөклөгөн хәстәр­ләү, һәр сәскәһенә, һәйкәле­нә, һуҡмағына иғти­барлы булыу кәрәк түгел­ме?! Теге йәки был урында үҙебеҙҙе ҡыйырһытҡанды һис кисерә алмай, шунда уҡ хаҡлыҡ дауларға кере­шәбеҙ, ә бер зыянһыҙ, тирә-яҡты йәмләп торған һәйкәл­дәргә ихтирамлы мөнәсәбәт күрһәтеү көсөбөҙҙән кил­мәй...