Республикабыҙ парламентының киләһе ултырышында ике доклад тыңланасаҡ, ике тиҫтәгә яҡын закон проекты ҡараласаҡ һәм Дәүләт Думаһы депутаттары иғтибарына федераль ҡануниәткә өҫтәмәләр тәҡдим ителәсәк. Дәүләт Йыйылышы – Ҡоролтай Президиумының сираттағы ултырышы шулай ҡарар итте.

Көн тәртибе проектындағы беренсе мәсьәлә – Башҡортостан Республика­һының Контроль-иҫәп палатаһы рәйесе вазифаһына кандидат тәҡдим итеү. Был йәһәттән әле Башҡортостан буйынса ведомство-ара Йәмәғәт хәүефһеҙлеге советы Секретары булып эшләгән Рәмил Исҡужинға өмөт бағлана.
Артабан депутаттар ауыл хужалы­ғын үҫтереүгә һәм республикабыҙҙа бала хоҡуҡтарының күҙәтелеүенә арналған докладтар тыңларға йыйына. Республика Башлығы ҡарама­ғындағы Дәүләт-конфессиональ мөнәсәбәттәр советы рәйесе Вячеслав Пятковтың выждан азатлығы тураһындағы сығышы ла яңғыраясаҡ.
Күп һанлы закон проекттары араһында “Башҡортостан Респуб­лика­һында туристик эшмәкәрлек тураһында”ғы Законға үҙгәрештәр индереү хаҡындағыһы мөһим урындарҙың береһен биләйҙер, моғайын, сөнки был тармаҡты үҫтереү буйынса бер нисә йыл рәттән эҙмә-эҙлекле саралар тормошҡа ашырыла. Ә был проект ҡунаҡханалар, тау саңғыһы трассалары, пляж кеүек объекттарҙы ойоштороусыларҙың эшенә рөхсәт биреүҙе, туристарға аҙашмаҫҡа йүнәлеш табыу сис­темаһын булдырыуҙы республиканың дәүләт власы органдарына тапшы­рыуҙы күҙ уңында тота. Үҙгәрештәр туристарҙың хоҡуҡтарын киңәйтергә һәм ял өсөн кәрәк-яраҡты ҡануни нигеҙгә таянып эшләүсе ышаныслы ойошмаларҙан ғына алырға мөмкин­лек бирергә тейеш.
Башҡортостандың быйылғы һәм 2017-2018 йылдарға планлашты­рылған ҡаҙнаһына үҙгәрештәр индереү тураһындағы закон проекты ла республика иҡтисады өсөн ҙур әһәмиәткә эйә. Был үҙгәреш федераль бюджеттан 2 миллиард 218,8 миллион һум өҫтәмә аҡса бүленеүе менән бәйле.
– Был аҡса нигеҙҙә ауыл хужалығы тармағын үҫтереүгә тотоноласаҡ, – тине парламенттың Бюджет, һалым, инвестиция сәйәсәте һәм территориаль үҫеш буйынса комитеты рәйесе Рузалия Хисмәтуллина. – Әлбиттә, уны барыһына ла өләшеп сығыуҙан бер фәтүә лә юҡ, шуға күрә матди ярҙам ауыл хужалығында яҡшы күрһәткестәргә өлгәшкән етәкселәргә генә биреләсәк.
Дәүләт Йыйылышы – Ҡоролтайҙың ошо мәсьәләләрҙе ҡараясаҡ ултырышы 16 июнгә тәғәйенләнде.