Башҡорт тигән милләт беҙ! » Башҡортостан гәзите | Газета Башкортостан на башкирском языке. Архив материалов.

Башҡортостан гәзите » Йәмғиәт » Башҡорт тигән милләт беҙ!

Башҡорт тигән милләт беҙ! 08.06.2016 // Йәмғиәт

Ысыах – яҡут халҡының йәйге Яңы йыл байрамы. Илдең баш ҡалаһындағы “Коломенское” музей-ҡурсаулығында ошо айҡанлы ҙур сара ойошторолдо. “Ысыах” һүҙе “муллыҡ” тигәнде аңлата, йәғни яҡут тәбиғәтенең оҙайлы ҡышҡы йоҡонан уяныуына, йәшеллеккә күмелеүенә ишаралай. Байрамға ир-егеттәр ҙә, ҡатын-ҡыҙҙар ҙа милли кейемдәрҙә килә, тигән шарты ла бар. Ысыахҡа ғәҙәти күлдәктә сығыу сараны ихтирам итмәү менән бер.

Быйылғы байрамда милли кейемдәге ҡыҙҙар араһында халыҡ-ара бәйге уҙҙы. Сит илдәрҙән, Рәсәй төбәктәренән 40-тан ашыу милләт вәкиле үҙ халҡының музыка ҡоралдары, йыр-бейеүҙәре менән таныштырҙы, тыуған төйәге хаҡында бәйән итте. Конкурстың төп еңеүсеһе итеп сыуаш ҡыҙы танылһа, Әбйәлил районының Байым ауылы ҡыҙы Мәҙинә Илһамова I урынға лайыҡ булды. II, III урындарҙы иһә Үзбәкстан һәм Дағстан вәкилдәре бүлеште.
Мәскәүҙә урындағы телевидениела сценарист булып эшләгән Башҡортостан ҡыҙы байрамда төлкө тиреһе менән биҙәп тегелгән милли кейемдә сығыш яһаны. Артабан ҡурайҙа һыҙҙыртып, был музыка ҡоралының тарихы, даны хаҡында бәйән итте. Тамашасылар алдында башҡорт думбыраһында уйнап, ҡумыҙҙа “Мирфәйзә”не сиртеп, бейеп уларҙы тамам таң ҡалдырҙы.
– Думбыра башҡа халыҡтарҙа ла бар, әммә беҙҙеке өс ҡыллы, борон уны ат ҡойроғо ҡылынан яһағандар, – тип аңлатып та китте Мәҙинә үҙ сығышында.
Яҡташыбыҙ Мәскәү башҡорттары ойошторған, ҡатнашҡан бөтә сараларҙың да уртаһында ҡайнап йәшәй, “Илһам” башҡорт театрын етәкләй.

Автор: Гөлсәсәк МОСТАЕВА.

Баҫып сығарырға