Халыҡ-ара балаларҙы яҡлау көнө һәм изге Рамаҙан айы алдынан Мәрйәм Солтанова исемендәге Ислам колледжы менән Башҡортостан мосолмандарының Диниә назараты “Рисәләт-Послание” гәзите һәм islamrb.ru сайты редакциялары ярҙамында Өфөлә конкурс ойоштороп, республиканың йәш быуын вәкилдәре араһынан Ҡөрьән сүрәләрен яттан иң яҡшы һөйләүселәрҙе асыҡланы.
Сара мәҙрәсә алдындағы майҙанда изге Ҡөрьән аяттарын уҡыуҙан башланды. Мәр­йәм Солтанова исемен­дәге Ислам колледжы директоры Илдар хәҙрәт Малахов, йыйы­лыусыларҙы тәбрикләп, рухи тәрбиә, әхлаҡ нигеҙҙәренең бала күңелен бәләкәй саҡтан уҡ биләргә тейешлеген бил­дә­ләне. Ҡаһирәләге “Әл-Әз­һәр” университетынан Өфөгә белем биреү маҡсатында килгән шәйехтәр ҙә телмәр тотто. Әйткәндәй, был остаздар араһында Ҡөрьән-хафиздар, йәғни изге китапты тулыһынса яттан белгәндәр бар. “Динде яҡшыраҡ белгән һайын кешенең күңеле нығы­раҡ сафлана. Ундай­ҙарҙың һүҙе йөрәк түренән сыҡҡанға яғымлыраҡ, тәьҫирлерәк һәм һис ялҡытмай”, – тине Илдар хәҙрәт Малахов.
Артабан конкурста ҡат­нашыусыларҙы, автобусҡа ултыртып, Дуҫлыҡ монументына табан алып киттеләр. Йыл­дағыса, һынауҙар теплоходта барасаҡ икән. Балалар үҙенең белем кимәлен күрһәтеп тә, ял итеп тә өлгөрә.
Элек Ҡөрьән сүрәләрен ятлаусылар ярышының ҡайһы көндә үтәсәге хаҡында бер нисә ай алдан хәбәр итер булғандар, тик быйыл ниңәлер һуңлағандар. Шуға ла ҡатна­шыу­сылар аҙыраҡ. Ҡайһы бер райондарҙан вәкилдәр кү­ренмәне. Уның ҡарауы, конкурс йәнле генә барҙы. Күрә­һең, йылдан-йыл көслөрәк, һәләтлерәк балалар ҡатнаша.
Белорет районы команда­һы ярышта алтынсы йыл рәттән ҡатнаша. Етәкселәре, Межгорье ҡалаһындағы мә­сеттең имам-хатибы Фәтих хәҙрәт Фәтҡуллин әйтеүенсә, Белорет ҡалаһынан, Көҙйыл­ғанан, Татлынан, Уҫманғәле менән Исмаҡайҙан йыйылып, ике автобуста юлға сыҡҡан­дар.
– Нисәмә йыл инде үҙебеҙ­ҙең район кимәлендә Исмаҡай ауылында ла Ҡөрьән уҡыусы­лар бәйгеһе ойошторабыҙ, – ти Фәтих хәҙрәт. – Былтыр көҙ яры­шырға йөҙҙән ашыу бала килгәйне. Уларҙың береһе лә баһаһыҙ ҡалмаһын, дини белемгә ынтылыштары, дәрт­тәре һүрелмәһен өсөн хәлебеҙҙән килгәнсә тыры­ша­быҙ. “Ҡөрьәнде өйрәтеү – кешегә ата-әсәһе бирә алған иң ҙур мираҫ”, – тигән бит пәйғәмбәребеҙ Мөхәм­мәт ғәләйһис-сәләм.
Уҫманғәленән Рәфис хәҙ­рәт ҡатыны һәм өс улы менән килгән. Өлкәндәре – 11 йәш­лек Фәтих – менән һөйләшә­беҙ. Ул 4 йәшенән бирле уҡый аяттарҙы, хәҙер инде дүрт тиҫтә самаһы сүрәне белә. Конкурста тәүге ҡатнашҡа­нында бер ниндәй ҙә урын алмаған булған, унан һуңғы­ларында иһә гел I, II дәрәжә дипломдарға өлгәш­кән. Ҡус­ты­һы Билал да тырышлыҡ, зирәклек менән алдыра. Иң бәләкәстәре лә бер нисә йылдан ағайҙары юлына баҫыр, моғайын.
Ғафури районының Һабай һәм Ҡауарҙы ауылдарынан да өмөтлө балалар менән таныштыҡ. Байтаҡ район һәм ҡаланан бар ине вәкилдәр. Улар имтихан үткәрелгән бүлмәгә этеш-төртөшһөҙ генә инә, белгәндәрен тыныс ҡына һөйләп бирә. Бере­һе­нең дә йөҙөндә еңеүгә, баш­ҡаларҙы уҙыуға ынтылыш юҡ. Үҙ көсөн һынау ғына мөһим кеүек барыһына ла. Жюри ағзалары диҡҡәт ме­нән тыңлай, өҫтәмә һорауҙар биргеләй. Ярыш шарттары буйынса 7 йәшкә тиклем­ге­ләр “Әл-Фил”дән “Ән-Нәс”кә тиклемге сүрәләрҙе ятларға тейеш булды, 7-нән 12 йәшкә саҡлыларға “Әл-Фәджр”ҙән аҙаҡҡыларын һөй­ләргә кәрәк ине, 12 – 16 йәш­лек­тәрҙән иһә “Ҡөрьән-Кәрим”дең 30-ҙан бер өлөшөн белеү талап ителде.
Ике сәғәт буйы теплоходта йөҙөп, өйлә намаҙы ваҡы­тына ғына мәҙрәсәгә кире ҡайтты­лар. Унда балаларҙы тәмле былау, рәхәт-лукум, татлы емеш­тәр һәм, әлбиттә, еңеүсе­ләрҙе бүләктәр көтә ине. Беренсе урын алғандар­ға ноутбук бирһәләр, икенсе һәм өсөнсө урындар өсөн кеҫә телефоны, спорт ҡорамалы һымаҡ ҡиммәтле әйберҙәр тапшырылды.