Бейер өсөн тыуған ул! » Башҡортостан гәзите | Газета Башкортостан на башкирском языке. Архив материалов.

Башҡортостан гәзите » Йәмғиәт » Бейер өсөн тыуған ул!

Бейер өсөн тыуған ул! 20.05.2016 // Йәмғиәт

Район мәҙәниәт һарайында үткән “Ҙур бейеүҙәр” исемле шоу-концерт кимәле ҙур, әһәмиәтле сараларҙыҡынан кәм булманы. Уның ойоштороусыһы Алтынай Вәлитов брейк-данс стилендә бейеүсе булараҡ киң танылған.
Егет Байназар мәктәбендә IX класты тамамлап, сәнғәт училищеһына юллана. Тап ошо мәлдә бейеү донъяһы менән ҡыҙыҡһына башлай. Брейк-данс стилендә шөғөлләнеүенә ете йыл, ошо дәүерҙә ул “Рәсәй-1” каналындағы “Ҙур бейеүҙәр” тапшырыуында ҡатнашып, Төркиәлә “Экстремаль бейеүҙәр театры”нда эшләп өлгөргән.
Егеттең сәнғәт һөйөүе тыуып-үҫкән ғаиләһенән килә: өләсәй-олатаһы йыр-бейеүгә оҫта булһа, әсәһе Фәйләрә Марс ҡыҙы йырлай, ҡурайҙа, ҡумыҙҙа, баянда, фортепьянола уйнай, ҡустыһы Аҡъегет – шулай уҡ брейкер, һеңлеһе Аҡйондоҙ халыҡ бейеүҙәре менән шөғөлләнә.
Киләсәктә Рәсәй эстрадаһына юл ярыу, сит илдәрҙә сәйәхәт итеү хыялы менән янған егет ТНТ каналында барған “Танцы” проектында ҡатнашыуҙы ла төп маҡсат итеп алған. Байтаҡ йәрәхәттәрҙән һуң да бейеүгә тоғро ҡалған, ауырлыҡтар ҡаршыһында ҡойолоп төшмәгән батырҙың яҡты ниәттәрен тормошҡа ашырасағында икеләнеү урынһыҙ.
Алтынай башланғысында ойошторолған “Ҙур бейеүҙәр” шоу-концертында уның ижадташ дуҫтары Роберт Әмиров, Айҙар Нурҡаев, Фәнис Үтәбаев, йырсылар МС Баш, Ильяс Айытбаев, юмор оҫтаһы Линар Ҡотлобаев һәм башҡалар сығыш яһаны. Тамашаны “Хәйерле Stand-Up кис” проекты резиденты Марсель Мөхәмәтйәнов алып барҙы. Уның көләмәстәре һәр кемдең күңеленә хуш килде. Шығырым тулы залдың һәр сығышты алҡыштарға күмеүе халҡыбыҙҙың бейеү сәнғәтенә йылы, ихтирамлы мөнәсәбәттә булыуын, бөтмәҫ-төкәнмәҫ һөйөүен сағылдырҙы.

Автор: Инзирә БАЯЗИТОВА. Район: Бөрйән районы.

Баҫып сығарырға