Өфөлә республика Башлығы Рөстәм Хәмитов “Йыл инженеры-2015” Бөтә Рәсәй конкурсы лауреаттары һәм “Case-in” Халыҡ-ара инженерҙар чемпионатының төбәк һайлап алыу турында еңеүселәр менән осрашты.

– Мин, инженер булараҡ, инженерҙарҙы сәләмләйем! Аралашыу бер телдә булыр тип ышанам, – тигән һүҙҙәр менән башланы ос­рашыуҙы Рөстәм Зәки улы. – Ниһайәт, йәмғиәттә инженерлыҡ эшенә ҡыҙыҡһыныу уянды. Был – алға ҙур аҙым. Йәштәр һәм ата-әсәләрҙең инженер һөнәренең кәрәкле булыуын аңлауы ҡыуандыра.
Осрашыу барышында конкурс лауреаттары – республиканың төп предприятиелары хеҙмәткәрҙәре үҙҙәренең проекттары менән таныштырҙы, төрлө һорауҙарға яуап бирҙе. Ә Өфө дәүләт нефть техник университеты командаһы вәкилдәре иһә инженерҙар чемпионатында ҡатнашыуҙары хаҡында һөйләне.
“Case-in” Халыҡ-ара инженерҙар чемпионаты 2013 йылдан алып үткәрелә. Был чемпионат йүнәлешле юғары уҡыу йортта­рының һәләтле студенттарын һәм аспиранттарын асыҡлауға, уларға ярҙам күрһәтеүгә, инженер-техник белемде популярлаш­тырыуға һәм ошо тармаҡтарҙың кадрҙар резервын туплауға йүнәлтелгән. Быйыл май аҙағында Мәскәүҙә үтәсәк конкурстың финалына Башҡортостандан Өфө дәүләт нефть техник университетының Салауат ҡалаһындағы филиалы студенттары командаһы “Brain Energy” барасаҡ.