Элекке журналистар булмай, тиҙәр. Ысынлап та, уй-кисерешен ҡағыҙға төшөрөп өйрәнгән кешенең ҡулы ҡәләм тотмай тора алмайҙыр ул. Ун һигеҙ йыл ғүмерен “Осҡон” гәзитендә хеҙмәт итеүгә бағышлап, унан башҡа урынға күскән Рәхимә Мусина ла яҙыуҙан айырылыуҙы күҙ алдына килтермәй.
– Журналистиканы ысын күңел­дән яратыр өсөн миңә был һөнәрҙән китергә кәрәк булған икән. Хәҙер үҙем теләгәнсә, йәнем теләгән темаға яҙыу мөмкин­легенә эйәмен, – ти ул. – Ҡасандыр бурыс тип кенә ҡараған хеҙмәттән әле рухи кинәнес алам.
Рәхимә Мөхитдин ҡыҙы дүрт йыл элек район китапханаһында эш башлай. Байрамдарҙы, ижад кисә­ләрен, осрашыу­ҙарҙы үҙен­сәлекле, тәрән йөкмәткеле итеп ойоштора, ихласлығы менән рух мөйөшөнә халыҡты күпләп ылыҡтыра.
– Эштә редакцияла туплаған тәжрибәм ныҡ ярҙам итә, – ти за­мандашыбыҙ. – Журналист хеҙмәте аралашыу оҫталы­ғына өйрәтте, райондағы һәр кеше менән тиерлек таныштырҙы.
“Осҡон”да оҙаҡ йылдар “Йәй­ғор” әҙәби битен сығарған, өс тиҫтәнән ашыу китап­тың мөхәр­рире булған Рәхимә Мөхитдин ҡыҙының яңы урында тиҙ арала уңыш ҡаҙа­ныуына ғәжәпләнәһе түгел. Бында килеү менән хаҡлы ялдағы ҡатын-ҡыҙ өсөн “Йәнгүзәл” клубын да ойоштороп ебәргән. Әйтеүенсә, китапхана уға өр-яңы донъя асҡан, психология, эзотерика буйынса әҙәбиәткә “сум­дырған”.
Әйткәндәй, Рәхимә Мусина алтын юбилейына “Хикмәтле был тормош” исемле икенсе йыйын­тығын сығарҙы һәм үҙенең ижад кисәһе менән бергә китап­тың исем туйын үткәрҙе. “Өлкәндәр өсөн тормош дәрес­леге” тип баһаланы­лар баҫ­маны был сарала. Һәр кемдең күңеленә яҡын темаларҙы күтәрә шул Рә­химә: мөхәббәт, тоғролоҡ, дуҫлыҡ, киң күңеллелек, көнсөллөк, хыянат, ғәфү үтенә белеү… Уҡыу­сыға аҡыл өйрәтмәй, ә уны фәлсәфәүи уйға һала.
– Йыйынтыҡта үҙем йә таныштарым менән булған хәл-ваҡи­ғаларҙан, тормош күренеш­тә­ренән сығып, тормоштоң ни тиклем хикмәтле, мөғжизәле булыуын әйтергә теләнем, – ти китап авторы.
Рәхимә – бар яҡлап ижадсы. Яҙыуға оҫта булыуынан тыш, ҡул эштәренә, бешеренергә, баҡса үҫтереүгә лә маһир ул. Энә һәм ырғаҡ менән бәйләгән кейем­дәренә һоҡланмаған кеше юҡтыр.
Һәр минуттың ҡәҙерен белеп йәшәй Рәхимә Мөхитдин ҡыҙы. Ире Нафиҡ Ғәле улының, улдары Илшат менән Ильястың ихтирам-һөйөүе тағы ла юғарыраҡ үрҙәргә әйҙәй ижадсыны.