Мәктәптәрҙә Берҙәм дәүләт имтиханына әҙерлектең ҡыҙыу осоро. Мәғлүм булыуынса, тәүге һынау (әҙәбиәттән һәм географиянан) 27 майҙа тапшырыласаҡ. Артабан иһә урыҫ теле (30 май), математика
(2 һәм 6 июнь) һәм башҡа предметтар килә. Һынау осоро – 20 июнгә тиклем. Унан ай аҙағына ҡәҙәр кисерерлек сәбәп буйынса имтиханда ҡатнаша алмағандар өсөн резерв көн ҡаралған.
Һынау тапшырыу өсөн предметтар һайлау эше 1 февралдә тамам­ланды. Уҡыусылар йәнә йәмғиәтте өйрәнеү, физика, биология, тарих, химияға өҫтөнлөк биргән.
Башҡортостан Мәғариф ми­нистр­лығынан хәбәр итеүҙәренсә, быйыл республикала Берҙәм дәүләт имтиханын 20 470-тән ашыу кеше тапшырасаҡ. Был­тырғы менән сағыштырғанда 984-кә аҙыраҡ. Имтихан алыу республика буйынса 103 пунктта ойошторола. Былтыр иһә 16-ға күберәк ине. Уларҙа ҡулайлаштырыу эше атҡарылған. Һөҙөмтәлә имтиханды үҙҙәрендә тапшырыу мөм­кинлеге булмаған 640 сығарылыш уҡыусыһы (улар Көйөргәҙе, Йылайыр, Йәрмәкәй, Балтас, Ҡыйғы, Краснокама, Стәрлетамаҡ һәм Куш­наренко райондарынан) һынау урынына автобуста алып барыласаҡ.
Быйыл Мәғлүмәтте эшкәртеү буйынса төбәк үҙә­ген йыһаз­ландырыу өсөн алты миллион һумдан ашыу аҡса бүлеү ҡарал­ған. Онлайн трансляциялы аудиториялар һаны 25 процентҡа арта. Биналар видеокүҙәтеү системаһы камералары менән йыһазлан­дырылған, сигнализация үткә­релгән, һаҡ ҡуйыласаҡ.
Министрлыҡта әйтеүҙәренсә, быйыл БДИ-ны алдан тапшырыу этабында тәүге тапҡыр контроль-үлсәү материалдарын аудиторияла баҫыу һәм имтихан материалдарын сканерлау технологияһы ҡулланылған. Бының өсөн алын­ған принтерҙар, сканерҙар февраль-мартта уңышлы апробация үткән, техник белгестәр әҙер­ләнгән.
Әйткәндәй, Рәсәйҙең Мәға­рифта күҙәтеү һәм контроль буйынса идаралығы 2017 – 2019 йылдарҙа “технологик БДИ” системаһына күсеү бурысын ҡуя. Контроль-үлсәү материалдарын аудиторияла баҫыу, имтихан эштәрен сканерлау, уларҙы бәйләнештең һаҡланған каналдары буйынса электрон рәүештә ебәреү сығымдарҙы кәметеү мөмкинлеген бирәсәк.
Мәғариф министрлығында йәмәғәт күҙәтеүселә­рен әҙерләү йәһәтенән ныҡлы эш алып барыла. Һынауҙы алдан тапшырыу этабына, мәҫәлән, 30 ке­ше аккредитация үткән. Быйылғы үҙенсәлекле яңылыҡ – йәмәғәт күҙәтеү эшенә БДУ-нан һәм БДПУ-нан 200-гә яҡын студент йәлеп ителә. Улар 26 апрелдә уҡыу үткән. Күҙәтеү эшендә шулай уҡ республиканың Йәмәғәт пала­таһы, Дәүләт имтихан комис­сияһы, Мәғарифта күҙәтеү һәм контроль идаралығы вәкилдәре лә ҡатнашасаҡ.
Ғәҙәттәгесә, республика Мәғариф министрлы­ғының рәсми сайтындағы “БДИ-2016” бүлегендә БДИ-ға бәйле барлыҡ мәғлүмәтте табырға мөмкин. Өҫтәүенә ведомствола, шулай уҡ Мәғлүмәтте эшкәр­теү төбәк үҙәгендә, муниципаль хакимиәттәрҙең мәға­риф идаралыҡтарында, дөйөм белем биреү ойош­маларында халыҡ өсөн “ҡыҙыу линия” эше ойошторолған.