Рәсәй Президенты Владимир Путин ҡул ҡуйған законға ярашлы, бынан ары 30 көн эштә булмаған һәм һайлаусылары менән бәйләнешен юғалтҡан өсөн Дәүләт Думаһы депутаттарының мандаттарынан “ҡолаҡ ҡағыуы” ихтимал.

Дәүләт Думаһы депутатының һәм Федерация Советы ағза­һының статусы тураһындағы статьяға ла төҙәтмәләр индерелә. Документта ҡаралғанса, халыҡ вәкиле 30 көн дауамында һәм унан күберәк ва­ҡытта бурысын үтәмәһә, һайлау­сылар менән эшләмәһә, Дәүләт Думаһы, комитеттар һәм комиссиялар ултырыштарында ҡатнаш­маһа, фракцияһының инициати­ваһы, шулай уҡ үҙе ағза булған комитеттың тәҡдиме буйынса мандатынан мәхрүм ителә ала. Мандатты тартып алыу тураһындағы ҡарарҙы Этика буйынса комиссия ҡабул итә.
– Бындай башланғысты хуп­лауыбыҙ хаҡында закон проекты тик­шерелгән саҡта уҡ белдер­гәйнек, – тине Дәүләт Йыйылышы – Ҡоролтай Рәйесе Константин Толкачев. – 2005 йылда уҡ республика ҡануниәтенә бурыстарын үтәмәгән, бер сәбәпһеҙ комитет йәки парламент ултырыштарына даими килмәгән осраҡта Дәүләт Йыйылышы – Ҡоролтай депутаты вәкәләттәренең ваҡытынан алда туҡтатылыу мөмкинлеген билдә­ләгән ҡәтғи норма индерелгәйне. Бындай регламенттар кәрәк тигән фекерҙәмен, сөнки улар депу­таттың эшен көйләү, яуаплылығын арттырыу мөмкинлеген бирә.