Башҡортостан мосолмандары­ның Диниә назараты рәйесе мөфтөй Нурмөхәмәт хәҙрәт НИҒМӘТУЛЛИН:

– Әс-сәләмү-ғә­ләй­күм үә рәх­мәтул-лаһи үә бәрәкәтүһ, хөр­мәт­ле ту­ған­дар! Һеҙҙе Бөйөк Еңеү­ҙең 71 йыл­лығы алдынан сә­ләмлә­үемә ифрат шатмын.
9 Май – ба­рыбыҙ өсөн дә ғәйәт әһә­миәтле көн. Әле ере­беҙ­ҙә ныҡ­лы баҫып тороуыбыҙ, балалар үҫтереүебеҙ, киләсәккә ҙур маҡсаттар ҡороп йәшә­үебеҙ өсөн Аллаһ Тәғәләгә шөкөрана ҡылырға, Бөйөк Еңеү­ҙе яулауға үҙ өлөшөн индергән ата-бабабыҙға, тыл хеҙмәтсәндәренә сикһеҙ рәхмәтле булырға бурыслыбыҙ, хөрмәтле йәмәғәт.
“Беҙ ерҙе һеҙгә йәшәү өсөн урын иттек, унда бөтөн шарттар, ризыҡ бар”, – тигән аят-кәримәләр әйтелгән “Ҡөрьән Кәрим”дә. Эйе, донъяла төрлө халыҡ ғүмер итә. Кемдер урманлы яҡта, бәғзеләр таулы урында, өсөнсөләр океандағы утрауҙа... Йәшәгән ере ниндәй генә булмаһын, һәр кем уны ярата, тыуған иле хаҡында күңелендә матур хис-тойғо йөрөтә. “Ватанды һөйөү – имандың бер өлөшө”, – тигән пәйғәм­бәребеҙ Мөхәммәт ғәләйһис-сәләм дә. Был яратыу тойғоһо, әлбиттә ки, һоҡ­ланыуға ғына ҡайтып ҡалмай. Әҙәм балаһы тыуған ерен һаҡларға, яҡларға, тәртиптә тоторға, унда күркәм ғүмер итергә, балалар үҫтерергә, төйәгенең бөгөнгөһө, иртәгәһе өсөн ҙур яуаплылыҡ тойорға тейеш.
Беҙҙең халыҡ борон-борондан ошо хәҡиҡәткә таянып йәшәгән. Еренә ҡур­ҡыныс янай икән, уны һаҡлау, яҡлау өсөн яу сапҡан, ситтәр ҡулына бирмәгән. Мәҫәлән,
“Аямаған йәнен, түккән ҡанын,
Һис бирмәгән башҡорт Уралын”, –
тигән билдәле юлдарға ғына ла күп мәғәнә һалынған.
Бөйөк Ватан һуғышында Еңеүҙә диндең өлөшө ҙур, хөрмәтле йәмәғәт. Уға, социалистик ҡоролошло илдә булһа ла, Икенсе донъя һуғышы башланыу менән ҙур иғтибар бүленә башлаған. Ниндәйҙер ауырлыҡ, хәүеф, ҡурҡыныс тыуһа, әҙәм балаһы шунда уҡ Аллаһ Тәғәләне иҫкә төшөрә бит. Раббыбыҙҙан юғарыраҡ көс юҡлығы тап шундай ваҡыттарҙа беленә лә. Мәғлүм булыуынса, герман һуғышы башланғас, иле­беҙ башлығы бар­лыҡ дин етәкселәрен саҡырып алып кә­ңәш­ләшкән, ерҙе һаҡлап ҡалыу өсөн барса мөмкинлекте файҙаланыу кәрәклеген әйткән. Маҡ­сатҡа ярашлы “Ҡөрьән Кәрим”де, башҡа ди­ни китаптарҙы баҫып сығарырға рөхсәт ителгән. Был, әлбиттә, еңеүгә ынтылған кешелеккә рухи аҙыҡ булған. Һуғыш йыл­дарында донъя күргән матбуғат баҫмаларында ла дингә ҙур урын бүленгән. Совет власының тыйыуына ҡарамаҫтан, мосол­мандарҙың күбеһе Аллаһ Тәғәләнән именлек һорап Ҡөрьән уҡыған, хәйер биргән, ғибәҙәт ҡылған. Башҡа диндәр вәкилдәре лә юғары көскә ышанысын юғалтмаған.
Бөйөк Еңеүҙең емештәрен ҡәҙерләп һаҡлаһаҡсы, хөрмәтле ҡәрҙәштәр. Бер-бере­беҙгә иғтибарлы, ихтирамлы булһаҡ, янъялға сәбәп эҙләп йөрөмәйенсә, татыу йәшәргә ты­рышһаҡ, изгелек итһәк, ин­шаллаһ, именлектең тамыры нығыныр, тармаҡланыуын дауам итер. Шул уҡ ваҡытта Бөйөк Ватан һуғышы яугирҙә­ренең, тыл хеҙмәтсәндәренең ҡаһар­ман­лығын онотмайыҡ. Уларҙың фиҙакәр­леге – илһөйәр­лектең иң ҙур өлгөһө. Иҫәндәренең ҡәҙерен беләйек, баҡый­лыҡҡа күскән ҡаһар­ман­дарыбыҙ­ҙың рухына тап төшөрмәйек, иншаллаһ. Әс-сәләмү-ғәләйкүм үә рәхмәтул-лаһи үә бәрәкәтүһ! Амин.