Хәрби техника Харьков­тағы 183-сө заводтың танк бүлегендә Михаил Ильич Кошкин етәкселегендә эшләнә. Проекттың уңыш­лы килеп сығыуын В-2 авиация тибындағы ҙур экономиялы яңы дизель моторы ҡуйыуға бәйләйҙәр. Уның ярҙамында юғары удель ҡеүәтенә эйә булған техника Бөйөк Ватан һу­ғышының башынан аҙа­ғынаса алғы сафта ҡатнаша. Маневр яһау һәләтенә эйә, тиҙлеге шәп, барлыҡ ҡатмарлы ерҙәрҙән еңел үтә ала.
Донъялағы танк эшләү практикаһында беренсе тапҡыр “Т-34” техникаһына оҙон көбәкле (30,5 калибрлы) пушка ҡуйыла. Ул башланғыс тиҙлеге буйынса сит илдәрҙең броняны тишә торған барлыҡ снарядтарын артта ҡалдыра.
1941 йылдың фев­раленән “Т-34” танкына 41 калибрлы көбәк ҡуйып сығара башлайҙар. Тиҙлеге лә арта – секундына 662 метр: бер саҡрым алыҫ­лыҡтан 60 милли­метрлыҡ броняны үтә сыға.
Конструкцияны яңыртыу танктың хәрби ҡеүәтен арттырыу, шул уҡ ваҡытта һуғыш дауамында сәнәғәт тармағын үҫтереү мөм­кинлеген бирә. 1942 – 1945 йылдарҙа “Т-34” танкы Урал һәм Себер яғындағы ҡеүәтле заводтарҙа күпләп етештерелә. Эш һуғыштан һуң да дауам итә. 183-сө Урал танк заводы был йәһәттән иң алдынғы­ларҙан һанала. Һуңғы модификация (“Т-34-85”) әле лә ҡайһы бер илдәрҙең ҡоралы булып тора.
“Т-34” донъяла танк эшләүҙең артабанғы үҫешенә ҙур йоғонто яһай. Хәрби һыҙаттарының күплеге арҡаһында бихисап белгестәр һәм эксперттар тарафынан Икенсе донъя һуғышының иң яҡшы хәрби техникаһы тип билдә­ләнгән. Төрлө модификациялары һәйкәл, музей экспонаты булараҡ әлегә ҡәҙәр һаҡлана.