Туғыҙ йыл элек наркотик матдәләр әйләнешен контролләү буйынса федераль хеҙмәттең Башҡортостан буйынса идаралығы булдырылғайны.
Ошо ваҡыт эсендә наркоконтроль хеҙмәткәрҙәре йәшерен юл менән эш иткән 16 мең енәйәтте асҡан. Уларҙың 13 мең самаһы айырыуса ауыр енәйәт ҡылыу тип иҫәпләнә. Наркомандарҙың 650 “ояһы” туҙҙырылған. Ете мең кешегә ҡарата 11 мең енәйәт эше ҡуҙғатылған, өс меңдән ашыуы хөкөмгә тарттырылған.
Махсус операциялар барышында 750 партия наркотиктың таралыуына кәртә ҡуйылған. Законһыҙ әйләнештән ике тонна самаһы наркотик һәм психотроп, шул иҫәптән 198 килограмм героин, 180 килограмм гашиш, 375 килограмм мәк һаламы һәм бер тонна марихуана тартып алынған. "Ҡара баҙар"ҙа ярты миллиард доза наркотик һатыу ошондай юл менән байығыусыларға 1,5 миллиард һум аҡса килтерер ине. Бынан тыш, наркоконтроль хеҙмәткәрҙәре йәйге-көҙгө айҙарҙа мәк һәм киндер баҫыуҙарында "мул уңыш йыя". Был да ваҡ-төйәк мәсьәлә түгел. Барлығы 2,4 мең тонна үҫенте юҡ ителгән. Уларҙан 476 тонна йәки 238 миллион доза мәк һаламы һәм марихуана әҙерләп булыр ине.
Һөнәри байрамдары уңайынан идаралыҡтың иҫкәртеү йүнәлешендәге эшмәкәрлеген дә билдәләп китеү урынлы булыр. Республика идаралығының наркотиктарҙың законһыҙ әйләнешенә ҡаршы көрәш буйынса программаһы 2007 йылда Бөтә Рәсәй конкурсында беренсе премияға лайыҡ булһа, артабан төп күрһәткестәр буйынса Волга буйы федераль округында беренсе урын бирелде. 2009 йылда иһә тотош Рәсәйҙә беренсе урын яуланды. 2010 йылда ла һынатманылар. Рәсәйҙәге иң ҙур, йәғни 200 самаһы кешенән торған ойошҡан енәйәтсел төркөм тотолдо. Уға 36 йәшлек Өфө кешеһе етәкселек иткән. Былтыр Урал — Волга буйы төбәгендә "аҡ ағыу" таратыу менән шөғөлләнгән 29 кешенән торған төркөм иркенән мәхрүм ителгән. Дөйөм хөкөм срогы — 195 йыл.
Ғөмүмән, идаралыҡ хеҙмәткәрҙәре тилерткес матдәләргә ихтыяжды кәметеү, уны республикаға индереү юлдарын ябыу, ойошҡан енәйәтсел төркөмдәрҙең йәшерен эшмәкәрлеген юҡ итеү кеүек көнүҙәк һәм мөһим бурыстарҙы уңышлы атҡара.