Һәр әсәгә үҙ балаһы
Түрҙәге түрә кеүек.
Тик ул ғына бар донъяны
Яҡтыға төрә кеүек.

Күренекле башҡорт шағирәһе Рәмзилә Хисаметдинованың шиғырынан ошо өҙөктө уҡығанда Өфө ҡалаһындағы 129-сы балалар баҡсаһы күҙ алдына баҫты. Тәрбиә үҙәгендәге ҡыҙ-малайҙарға һоҡланмау мөмкин түгел: береһенән-береһе отҡор, илгәҙәк һәм телсәр улар.

– Тәрбиәселәр һәр сараны мөмкин тиклем бай йөкмәткеле һәм иҫтә ҡалырлыҡ итеп ойошторорға күнеккән. Ғөмүмән, кисә булһынмы, осрашыу тиһеңме, төр­ләндереп үткәреү яҡлылар, – тип һөй­ләй балалар баҡса­һы мөдире Татьяна Горбунова. – Кескәй­ҙәрҙең һәр береһенә айырым ҡараш булдырылған. Хәҙер бит улар әҙ хәрә­кәтләнә, компьютерға бәйләп ҡуйған шикелле тик ултыралар. Ниәт – хәрәкәт уйындарын көсәйтеү һәм йышайтыу.
Ҡышты оҙатыу, яҙҙы ҡаршылау байрамдарына ла етди әҙерләнгәндәр. “Һәр миҙгелдең үҙ йәме”, “береһе лә икен­сеһен ҡабатламай”, “барыһы ла матур көндәр бүләк итә” тигәнде апайҙары уларҙың күңел­дәре­нә һеңдерергә тырыша.
Тәрбиәсе Рита Степанова төшкө аш һәм йоҡо сәғәте алдынан балаларҙы саф һауа һулап ки­лергә урамға алып сыҡты. Тышта ойош­торолған уйын бүл­мәләгенән һис тә кәм түгел икәнен үҙ күҙ­ҙәребеҙ менән күр­ҙек. Рита Рәшит ҡы­ҙы билдәләүенсә, бала күңеле – аҡ ҡа­ғыҙ, ни сыймаҡла­һаң, шул яҙыла, шуға күрә лә изгелекте уларҙың йөрәктәренә мөмкин тиклем мул һеңдерергә тырышалар. Яҡшылыҡтың яуызлыҡты еңерен, аҡтың ҡараға ҡара­ғанда өҫтөнөрәк булыуын һәм башҡа шундай ыңғай күре­нештәрҙе лә төплө дәлилдәр килтереп, ябай тел менән аңлаталар.
Балалар баҡсаһы иркен урынлашҡас, бында һәр төркөмгә уйындар ойоштороу өсөн уңайлыҡтар етер­лек. 320-нән ашыу бала өсөн, әл­биттә, тәү сиратта яҡ­шы шарттар тыуҙы­рыу мөһим. Етәксе­лек уй-ниәттәрен ошоно күҙ уңында тотоп тормошҡа ашыра ла инде.
Татьяна Владими­ровнаның һүҙҙәренә ҡарағанда, тәрбиә­селәрҙең ата-әсәләр­гә яҡын тороуы, улар менән тығыҙ бәйлә­неш урынлаштырыуы шул тиклем отош­ло. Бында ҡайһы бер саралар фәҡәт өлкәндәрҙең ҡатнаш­лығында үтә, был ысул бер төрлөлөк­тән арындыра икән.
“Акварелька” һүрәт төшөрөү, “Алтын ҡулдар” бәйләү, “Грамотейка” уҡырға өйрәнеү түңәрәктәре, “Тыуған көн” байрамы, аэробика са­быйҙар тарафынан көтөп алына.
Сәғәт телдәре төшкө берҙе күр­һәткәндә малай һәм ҡыҙҙар татлы йоҡоға талды, киләсәккә көс йыйыр өсөн, алдағы көндәрҙә лә шаярып-көлөп рәхәтләнер өсөн...