Илдең бәрәкәте ғаиләнән башлана. Тәртип һәм татыулыҡ булмаған ерҙә игелекле балалар үҫеүе лә икеле. Республикабыҙ именлеге һәм киләсәге һау-сәләмәт, эшһөйәр балалар тәрбиәләүсе тырыш, булдыҡлы ғаиләләргә бәйле.
— Президентыбыҙ Рөстәм Хәмитовтың 2012 йылды Имен бала саҡ һәм ғаилә ҡиммәттәрен нығытыу йылы тип иғлан итеүе бик дөрөҫ. Балалар тәрбиәләүгә иғтибарҙы арттырырға кәрәк, — ти Шишмә-Үрәкәй ауылында 51 йыл бергә татыу ғүмер кисереп, бер ҡыҙ һәм дүрт ул тәрбиәләп үҫтергән 72 йәшлек Рәзимә Исламғәли ҡыҙы менән 78 йәшлек Әхсән Йыһанур улы Миңлеғәлиевтәр. — Татыулыҡтың сере — әҙәп-әхлаҡта. Тик үҙенең тәрбиә ҡанундарын булдыра алғандар ғына, матур ғаилә ҡороп, тәрбиәле балалар үҫтереп, тормош юлынан ҡулға-ҡул тотоношоп үтә ала. Әйткәндәй, был донъя көткәндә бер-береңә юл ҡуя, етешһеҙлектәрҙе, хаталарҙы кисерә белеүгә лә ҡайтып ҡала.
11 ейән-ейәнсәренә һөйөклө олатай һәм өләсәй булған Миңлеғәлиевтәрҙең тормош тәжрибәһе ҙур. Ысынлап та, ғаилә татыу, ырыҫлы булғанда ғына йәшәүгә ынтылыш арта, киләсәк тә яҡтыраҡ һәм йәмлерәк тойола.