Ҡатын-ҡыҙҙың булмышы — әсә булыуҙа. Шуға күрә Халыҡ-ара ҡатын-ҡыҙҙар көнөндә әсәләрҙе тәбрикләү изге йолаға әүерелгән. Башҡортостан Президенты Рөстәм Хәмитов республиканың төрлө райондарынан йыйылған алтмышҡа яҡын гүзәл затҡа “Әсәлек даны” миҙалы тапшырҙы.
— Республиканың барлыҡ ир-аты исеменән һеҙҙе Халыҡ-ара ҡатын-ҡыҙҙар көнө менән ҡотлайым. Һаулыҡ, уңыштар, иң мөһиме — балаларығыҙ сәләмәтлеге, уларға белем биреү, яҡшы кеше итеп үҫтереү мөмкинлеге булыуын теләйем, — тине.
Башҡортостан Президенты беҙҙә күп балалы ғаиләләргә ярҙам итеүҙең дәүләт социаль сәйәсәтенең өҫтөнлөклө йүнәлеше булыуын һыҙыҡ өҫтөнә алды.
— Был йәһәттән республикабыҙ Рәсәйҙең башҡа төбәктәренән айырыла. Беҙҙә 34 меңдән ашыу күп балалы ғаилә бар. Үҙебеҙсә уларға ярҙам итергә тырышабыҙ: түләүһеҙ ер бүләбеҙ, матди ярҙам күрһәтәбеҙ. Күберәк ярҙам итке килә лә бит, тик мөмкинлектәребеҙ сикле, уны үҫтерергә кәрәклеген аңлайбыҙ, — тине Рөстәм Хәмитов.
Әсәләр иһә үҙ сиратында Президентҡа һәм республика етәкселегенә ярҙам һәм иғтибар өсөн рәхмәт белдерҙе. Үҙҙәренең ғаиләләре һәм балалары тураһында һөйләне. Октябрьский ҡалаһынан Эльвира Бәширова — алты бала әсәһе.
— Минең өс ҡыҙым һәм өс улым бар. Улар һеҙҙең ҡулығыҙҙы ҡыҫыуҙы, ә башҡа әсәләрҙе байрам менән ҡотлауымды һораны, — тине ул. — Награданы ирем менән дә бүлешәм, сөнки ҙур ғаиләлә барлыҡ нәмә менән уртаҡлашып йәшәү күнегелгән. Әгәр ир-ат яуаплы булмаһа, был тиклем бала табырға баҙнат итмәҫ инек.
Дыуан районының Иҫке Хәлил ауылында йәшәүсе Рәзинә Мөхәмәтова биш балаға ғүмер биргән. Венер, Эдуард, Алгиз, Айназ һәм Наилә үҫә татыу ғаиләлә. Үҙе ауыл клубы хеҙмәткәре, ире — водитель. Ғаиләләренә етерлек мал-тыуар аҫрайҙар, баҡса тултырып йәшелсә, емеш-еләк үҫтерәләр. Әлбиттә, хужалыҡта төп ярҙамсы — малайҙар.
— Иң ҡиммәтле байлығым, ҡыуанысым һәм йыуанысым — балаларым. Янымда улар булғанда барлыҡ ауырлыҡтар онотола. Бер ҡасан да күп бала менән ауыр тип уфтанғаным булманы, киреһенсә, рәхәтләнеп йәшәйем, — ти әсә, балалары менән ғорурланып.
Бүләкләнеүселәр республиканың төрлө район һәм ҡалаларынан килгән. Араларында һәр ваҡыттағыса балаларға, мәҙәниәткә, халыҡҡа яҡын һөнәр эйәләре — уҡытыусылар, тәрбиәселәр, ашнаҡсылар, гәзит ташыусылар бихисап ине. Әйткәндәй, был юлы награда алыусылар араһында 5500-сө миҙалдың эйәһе лә булды.