Һәр кем үҙ халҡына хеҙмәт итергә, уның бөгөнгөһөн һәм киләсәген ҡайғыртырға бурыслы. Кеше тормошоноң бар мәғәнәһе шунан ғибәрәт тиерлек. Тыуған илеңә, ватандаштарыңа һөйөү, тоғролоҡ тойғоһо бер ниндәй ҙә донъяуи ҡараштарға, ҡанундарға буйһонмай. Ул йөрәктән урғылып сыға.

М. Аҡмулла исемендәге Башҡорт дәүләт педагогия университетының башҡорт филологияһы факультетында йәмәғәт эшмәкәре, Рә­сәйҙең һәм Башҡорт­остан­дың атҡаҙанған табибы, медицина фәндәре докторы, Дәүләт Думаһы депутаты Сәлиә Мырҙабаева, шашка буйынса биш тапҡыр донъя чемпионы, халыҡ-ара гроссмейстер Тамара Танһыҡ­ҡужина, шулай уҡ донъя чемпионы Айнур Шәйбәков менән осрашыу булды.
Студенттар ҡунаҡтарҙы ихлас ҡабул итте. Башҡорт фило­логияһы факультеты деканы, филология фәндәре докторы, профессор Луиза Сәмситова уҡыу йортоноң эшмәкәрлеге хаҡында һөйләне. Филология фәндәре кандидаты, шул уҡ факультет уҡытыусыһы Зәки Әлибаев абруйлы ҡунаҡтар менән таныштырҙы.
Сәлиә Мырҙабаева иһә сығышын Рәми Ғариповтың һәм Мостай Кәримдең ши­ғыр­ҙарын һөйләүҙән башланы. Әлбиттә, был студенттар өсөн көтөлмәгән күренеш булды: абруйлы вазифалағы шәхес бик күп шиғыр белә икән дәбаһа! “Мин – үҙ мил­ләтемдең тоғро вәкиле, уның киләсәге өсөн хәлемдән килгәнен эшләйем”, – тине ул. Артабан үҙенең эшмә­кәрлеге менән таныштырҙы. Баҡтиһәң, ул – Башҡортостан юлдаш телевидениеһында барған “Башҡорт телен өйрәнәм”, “Ағинәйҙәр ҡоро”, “Йәштәргә һаулыҡ”, “Урал аръяғында шашка спорты” һ.б. бик күп проекттар авторы. Шулай уҡ Мәскәүҙәге “Башҡортостан студенттары ассоциацияһы”на, Өфөләге балалар йорттарына, мат­буғат баҫмаларына ярҙам күрһәтә.
Тамара Танһыҡҡужина ме­нән дә студенттар күптән осрашырға теләй ине. Улар донъя чемпионының сығы­шын йотлоғоп тыңланы, сөнки уның тормош юлы, спортта юғары ҡаҙаныштарға өлгәшеүе йәш быуынға бик ҡыҙыҡлы. Студенттар был мөмкинлекте ҡулдан ысҡын­дырманы, үҙҙәрен ҡыҙыҡ­һындырған һорауҙарға яуаптар алды.
Айнур Шәйбәковтың проекттары ла бик ҡыҙыҡлы һәм фәһемле булып сыҡты. Ул, Дәүләт Думаһында Йәштәр советы ағзаһы булараҡ, киләсәк быуын мәнфәғәтендә ҡаралыусы закон башлан­ғыстары тураһында файҙалы мәғлүмәт бирҙе, шашка, шахмат уйындарының сәлә­мәтлеккә ыңғай йоғонто яһа­уы, үҙ йүнеңде күреү, әмәлен табыу юлдары хаҡында һөй­ләне.
Артабан Сәлиә Шәрифйән ҡыҙы студенттар менән әң­гәмә ҡорҙо, уларҙың бик ҡыҙыҡлы, үҙенсәлекле һорау­ҙарына яуап бирҙе.
Киләсәктә лә ошолай абруйлы шәхестәр тәжрибәләре һәм кәңәштәре менән уртаҡ­лашып торһа, йәш быуын тура юлдан, дөрөҫ йүнә­лештән тайпылмай алға барыр.