Уҡытыусыларҙы өйрәтәһе түгел: эшләй ҙә, хеҙмәтен күрһәтә лә, сәмләнеп ярыша ла белә улар. Һәр тантананы ҡабатланмаҫ, сағыу байрамға әйләндерәләр. Был юлы ла шулай булды: республика буйынса 26-сы тапҡыр үткәрелгән “Йыл уҡытыусыһы” конкурсының йомғаҡлау өлөшө еңеү сәме, ҡыуаныс-шатлыҡ, күҙ йәштәре менән бергә ҡушылды.

Мәғлүм булыуынса, бәйгегә 140 педагог сыҡҡайны. Улар Өфө мәктәптәрендә асыҡ дәрес үткәреп, эш тәжрибәһен күрһәтте, мәғариф проектын яҡланы, “оҫталыҡ класы” күрһәтте, “түңәрәк өҫтәл”дәрҙә фекер-тәҡдимдәре менән уртаҡлашты. Ғөмүмән, баш ҡалабыҙ аҙна дауамында ҙур белем майҙаны булып хеҙмәт итте.
Ярышты йомғаҡлау тантанаһында уҡытыусыларҙы тәбрикләргә Дәүләт Думаһы депутаттары Зөһрә Рәхмәтуллина, Сәлиә Мырҙабаева, Рөстәм Ишмөхәмәтов, Дәүләт Йыйылышы – Ҡоролтай Рәйесе урынбаҫары Йомабикә Ильясова, мәғариф министры Гөлназ Шафиҡова, респуб­ликаның педагогик йәмәғәтселек вәкил­дәре килде. Байрамда тәүҙә номинациялар буйынса еңеүселәр билдәләнде. “Йөрә­гемде балаларға бирәм”, “Һөнәргә тоғ­ролоҡ”, “Педагогик оҫталыҡ өсөн”, “Мәғариф өмөтө”, “Электрон техноло­гияларҙы һөҙөмтәле файҙаланған өсөн”, “Ватансылыҡ һәм мәҙәни ҡиммәттәрҙе һаҡлау” – уҡытыусыларҙың алдына ҡуйылған барлыҡ бурыстар сағылыш тапҡандай был атамаларҙа.
Артабан сәхнәгә финалға сыҡҡан педагогтар күтәрелде. Улар араһынан еңеүселәр – урыҫ теле һәм әҙәбиәтенән Марат Ямалетдинов (Стәрлетамаҡ ҡалаһының 3-сө башҡорт лицей-интернаты), татар теле һәм әҙәбиәтенән Гөлшат Мансурова (Стәрлетамаҡтың 31-се мәктәбе) – билдәләнде. Конкурстың күркәм яңылығы ла бар: йәш педагогтарҙың иң көслөһө асыҡланды. Ул – Өфөләге 58-се лицейҙың физкультура уҡытыусыһы Сергей Шекунов. Ғөмүмән, быйылғы бәйгелә йәш белгестәргә айырым ҙур иғтибар бүленде. “Был беҙҙең өсөн ифрат мөһим, – тип баһаланы күркәм башланғысты Сергей Шекунов. – Әҙерлегебеҙҙе, бәләкәй генә булһа лә тәжрибәбеҙҙе күрһәтеү мөмкинлеген алдыҡ. Тимәк, конкурстың даирәһе тағы ла киңәйәсәк”.
Бәйгенең төп бүләгенә лә йәш педагог – баш ҡалалағы 159-сы мәктәптең тарих уҡытыусыһы Сергей Переверзев – лайыҡ булды. Абсолют еңеүсе лә – ул!