Ҡайҙа ғына, ниндәй генә мөхиттә йәшәмәһен, рухи ҡиммәттәренән айырылмаған кеше ҙур һоҡланыу тыуҙыра. Намыҫ, ихтыяр көсө, тоғролоҡтоң сағылышы ул үҙең булып ҡалыу.

Татарстандың Яр Саллы ҡалаһында ғүмер иткән Айгөл Балағот­динова – тап шундай һоҡланғыс милләттәш­тәребеҙҙең береһе. Ас­ҡын районы ҡыҙы тиҫтә йыл инде күрше төбәктә башҡорт телен өйрәтә. Дәрес үткәреү менән генә хушһынып ҡалмай ул, заманында Яр Саллыла күпләп төйәкләнгән мил­ләттәштәребеҙ ара­һын­да аңлатыу эше алып бара, төрлө саралар, осра­шыу­ҙар ойоштора. Белемен камил­лаш­ты­рыуға айырыуса ҙур иғтибар бүлә педагог. Ошо көндәрҙә рес­пуб­ликабыҙҙа 21-се тап­ҡыр үткәрелгән “Баш­ҡорт теле һәм әҙәбиәте йыл уҡытыусыһы” төбәк-ара конкурсында ла уңышлы сығыш яһаны.
– Сараның әһәмиәте баһалап бөт­көһөҙ, – тип тәьҫораттары менән уртаҡ­лашты Айгөл Илдар ҡыҙы. – “Йөрөгән таш шымара” тигәндәй, уҡытыусы гелән тәжрибә уртаҡлашып, үҫешкә ынтылып йәшәргә тейеш. Хеҙмәттәштәр менән осрашып, уртаҡ мәсьәлә­ләр хаҡында фекер алышып, сикһеҙ дәрт-дарман алабыҙ.
Быйылғы конкурста 46 педагог көс һынашты. Ярыш ике этапта үтте. Тәүгеһендә уҡытыусы­лар баш ҡала мәктәптә­рен­дә асыҡ дәрес күр­һәтте. Икенсеһендә иһә үҙҙәре төҙөгән мәғариф проекттарын яҡланылар, “оҫталыҡ дәре­се” уҙғар­ҙылар, педагогик баш­ланғыс­тарын тәҡдим иттеләр. Һөҙөмтәлә төр­лө номинация буйынса еңеүселәр билдә­ләнде, биш кеше финалға сыҡты. Төп бүләккә иһә Ишембайҙағы Әхмәтзәки Вәлиди исемендәге 2-се башҡорт гимназия-интернаты уҡытыусыһы Фаягөл Әмирханова лайыҡ булды. “Һәр саҡ үҫешкә, яңылыҡҡа ынтылыу мөһим. Балалар уҡытыусының шул сифатын айырыуса ярата”, – тине 30 йыллыҡ хеҙмәт стажына эйә педагог.
– Һынау майҙанында көндәлек ауыр хеҙмәте­геҙ, фиҙакәрлегегеҙ, маҡ­сат­та­рығыҙ тулы­һын­са сағылыш тапты, – тине конкурсты йом­ғаҡлау тантанаһында рес­пуб­ликаның мәғариф министры Гөлназ Шафи­ҡова. – Тәжрибә менән йәш­лекте берләштергән күркәм тамашаға шаһит булдыҡ. Беҙҙең өсөн барығыҙ ҙа – еңеүсе. Туған телебеҙҙең һа­ғын­да тороп, тотош төбәге­беҙҙең, милләтебеҙҙең, мәҙәниәтебеҙҙең үҫеше­нә ҙур өлөш индергәне­геҙ өсөн һеҙгә сикһеҙ рәхмәт­лебеҙ.
Кисә иһә “Йыл уҡы­тыу­сыһы-2016” конкурсы тантаналы асылды. Педагогтар бөгөн тәүге этапта көс һынаша.