Һуңғы йылдарҙа районда крәҫтиән (фермер) хужалығы ойоштороп, үҙ кәсебенә тотоноусылар арта. Был, әлбиттә, ҡыуандырмай ҡалмай. Әлегә алты мең кеше шәхси эшен асҡан булһа, бөтәһе 60 крәҫтиән хужалығы теркәлгән. «Йәрмәкәй районында бәләкәй һәм урта зшҡыуарлыҡты үҫтереү» программаһына ярашлы быйыл биш крәҫтиән (фермер) хужалығы дәүләттән 1 миллион һумдан ашыу күләмдә аҡсалата ярҙам алған.
Рәтамаҡ ауылынан Нурислам Шә­ри­фуллин оҙаҡ йылдар ауыл хужа­лығында ябай кө­төү­се, ферма мөдире булып эш­ләп, хаҡлы ялға сыҡҡан. Тик, бала саҡтан мал араһында үҫкән­гәлер инде, ялдамын тип буш ятыуҙы өнәмәгән ул, күңе­ленә яҡын шөғөл – йылҡы үрсе­теү – хаҡында хыял­ла­нырға ке­решкән. Бер мәл булған аҡ­са­һына бер нисә баш йылҡы малы һа­тып алып, шәхси иха­таһындағы аттарын да ҡушып, тәүәккәлләргә ҡарар иткән. Ауыл ситендә хужаһыҙ торған бер нисә бинаны ҡуртымға алып, бер аҙ ремонт үткәргән.
2015 йылда крәҫтиән (фермер) хужа­лығын ойошторған йүнсел уҙа­ман. Әлегә был эште яңғыҙы ғына алып бара, әммә киләсәктә бер нисә кешене мәшғүл итергә уйлай.
– Мәктәпте тамамлағас та ауыл хужалығына эшкә килдем һәм шул көндән бирле тормошомдо малһыҙ күҙ алдына килтерә лә алмайым, – ти ат йәнле егет. – Бөгөн, шөкөр, дәү­ләт тарафынан үҙ эшен асыусыларға һәр яҡлап ярҙам күрһәтелә, ярҙам тоябыҙ.
Нурислам Разетдин улы күптән түгел яңы эш башлаусы фермерҙарға махсус програм­маға ярашлы бүленгән аҡсаға Баймаҡ районынан башҡорт тоҡомло дүрт ҡолон һатып алған. Әле хужалығында 23 баш йылҡы бар. Артабан, матди-техник базаны нығыт­ҡас, аттарын арттырырға иҫәп тота йүнсел. Өйөр йыл әйләнәһенә тибендә йөрөй. Бейәләрҙе быуаҙ сағында һәм ҡолонлау осоронда ғына ялан кәртәгә алып ҡайталар.
Киләсәктә ҡымыҙ, ҡаҙы, ит етеш­тереүҙе юлға һалырға ниәтләй Нурислам Шәри­фул­лин. «Эшем көйлә­неп, дәүләт­тән тағы бер аҙ ярҙам алып булһа, тоҡомсолоҡ хужалығы ойошто­рорға ине», – тип хыяллана. Шулай уҡ берәй техника һатып алырға уйлай, ул саҡта инде сәсеүлегендә һоло үҫтереү мөмкинлеге тыуасаҡ. Әлегә Шәрифуллин ашлыҡты башҡаларҙан һатып ала.
Фермерҙың 30 гектар сабын­лығы бар. Ҡышҡылыҡҡа мал аҙығы әҙер­ләгәндә уға улдары, туғандары ярҙамға килә.