Тәбиғәт йоҡонан уяна, ҡояш нурҙарына иркәләнеп түбәләрҙән тәүге тамсылар тама. Шундай саҡта үҙенән-үҙе донъяға һоҡланаһы килә. Ә донъя беҙ йәшәгән ерҙән башлана. Был осраҡта һүҙ ҡала мөхите хаҡында бара. Меңдәрсә кешелек ҡалалағы күп фатирлы йорттарҙы ҡышҡы айҙарҙа йылы тотоу, эҫе һыу менән тәьмин итеү, уңайлы йәшәү шарттары тыуҙырыу өсөн ниндәй тырышлыҡ кәрәклеген “Теплоэнерго” йәмғиәте директоры Розалия Аҡбашева яҡшы белә.
– Торлаҡ-коммуналь хужалыҡ хеҙмәт­ләндереүе – ауыр ҙа, яуап­лы ла эш. Ул ифрат ҙур көс, таһыллыҡ, сослоҡ талап итә. Ең һыҙғанып тир түккәндә генә һөҙөм­тәһе үҙеңде лә, халыҡты ла ҡы­уандыра. Шуға күрә беҙҙә уңған­дар, тырыштар, үҙ көсөнә ышан­ғандар ғына эшләй, – ти етәксе, үҙенең хеҙмәт­тәштәре менән ғорурланып.
Ғорурланырлыҡ та шул! Йәм­ғиәт Бәләбәй ҡалаһында ғына түгел, республикала алдынғы булып танылған. Тап ошо көн­дәр­ҙә Розалия Аҡбаше­ва­ның фи­ҙакәр хеҙмәтен баһалап, уны “Баш­ҡорт­ос­тан Республикаһы­ның атҡаҙанған торлаҡ-коммуналь хужалығы хеҙмәткә­ре” исеме менән бүләкләнеләр. Улар хеҙ­мәт­ләндергән йорттарҙа йәшәгәндәр хаҡлы рә­үештә, йәмғиәттән уң­дыҡ, ти­ҙәр, сөнки хеҙмәт­ләнде­реү сифаты юғары.
Розалия Аҡбашева оҙаҡ йылдар “Бәләбәйавтонормаль” заводында баш бухгалтер булып эшләй. “Башкиргаз” йәмғиәтенең “Бәләбәй” филиалында тәж­рибә туплай. Һуңғы ун йылда “Тепло­энерго” йәмғиәтенә етәкселек итә. Зифа буйлы, йөҙ һәм күңел күркәмлеге менән үҙенә тартып торған нәзәкәтле был ханымдың сәмлелегенә, саялы­ғы­на, ойоштороу маһирлығына һоҡланмау мөмкин түгел.
Йәмғиәт Бәләбәй ҡалаһын­дағы биш эре ҡаҙанлыҡтың эше өсөн яуаплы, бынан тыш, Приют, Аксаков ҡасаба­һын­да, “Аҡсар­лаҡ” балалар һауыҡтырыу комплексында – йәмғеһе ун бер ҡа­ҙан­лыҡ­тың эшен көйләй. Предприятие йөҙ саҡ­рымдан ашыу йылылыҡ селтәрен хеҙ­мәтлән­дерә, ҡалалағы 521 торлаҡ йортто йылы һәм 138-ен эҫе һыу менән тәьмин итә.
Быйыл ун йыллыҡ юбилейын билдә­ләйәсәк йәмғиәт Башҡорт­ос­тандың Тор­лаҡ-коммуналь хужалығы министр­лы­ғы тәҡдиме буйынса тармаҡта Рә­сәй­ҙең ун алдынғы ойошмаһы милли реестрына индерелде. “2013 йыл пред­прия­тиеһы” исеменә лайыҡ булыуҙары ла оло абруй, фиҙакәр хеҙмәт хаҡында һөйләй.
Розалия Аҡбашева быны тотош кол­лективтың уңышы тип билдәләй. Предприятиела тырыш эшсәндәр етерлек. Баш энергетик Ришат Заһретдинов, баш инженер Риф Хәйретдинов, участка начальнигы Владислав Болдырев, баш бухгалтер Римма Камартдиноваға таяна етәксе. Ғаилә династияһынан Әхмәҙиев­тәр, Ғилметдиновтар, Водопьяновтар, Филенко, Лущиц ғаилә­ләре уңғандары тәүлектең телә­һә ҡайһы мәлендә эшкә тотонорға әҙер.
“Теплоэнерго” хеҙмәткәрҙәре Бәлә­бәй халҡынан үҙҙәренең эшмәкәрлеге айҡан­лы тик рәхмәт һүҙҙәре генә ишетә.