Бөгөн йәштәр өсөн иң төп проблемаларҙың береһе – торлаҡ мәсьәләһе. Был ысынлап та шулай. Торор урының булмау ҙур мәшәҡәт тыуҙыра, хатта ошо арҡала күп кенә йәш ғаиләләр тарҡала. Балтас районында был мәсьәләне хәл итеү маҡсатында "Йәш ғаиләләрҙе торлаҡ менән тәьмин итеү", "2012 йылға тиклем ауылды социаль үҫтереү" программаларына һәм торлаҡ шарттарын яҡшыртыуға мохтаж булған ғаиләләргә дәүләт ярҙамы күрһәтеү буйынса республика программаһына ярашлы аҡса бүленә.
2006 йылдан башлап райондың 65 йәш ғаиләһенә ошондай бәхет йылмайған да инде. Башҡа программалар буйынса ла күптәр өй туйлаған. Әле урындарҙа йәш ғаиләләргә өй һалыу өсөн ер участкалары бирелә.
– Туйыбыҙға бер туған ағайым өйлөк бура бүләк иткәйне, ер участкаһы алып, йорт һалып инергә булдыҡ, – ти Зөлфәт Ғайсин.
Йәш ғаилә тәүҙә йортто Көнтыуыш ауылында, Зөлфәттең атай нигеҙендә, һалырға уйлайҙар, әммә эш мәсьәләһе киҫкен булғас, район үҙәген һайлайҙар. 2005 йылда өйҙөң нигеҙе лә һалына, тик, аҡса етешмәү сәбәпле, төҙөлөш туҡтап ҡала. Әммә Ғайсиндарға бәхет йылмая: өсөнсө балаға әсәлек капиталын алған саҡта, уларҙың ғаиләһен "2012 йылға тиклем ауылды социаль үҫтереү" программаһына индерәләр. Бер миллион һумға яҡын аҡса тик төҙөлөшкә тотонола. Аҡса булғас, эш тағы ла дәррәү башлана. Ихатала яңы мунса, мал аҙбары ла тиҙ арала күтәрелә.
Бөгөн улар иркен, яҡты, бөтә уңайлыҡтары булған йортта йәшәй. Газ үткән, йылы һәм һыуыҡ һыу өйҙә, бәҙрәф, душ бүлмәһе бар. 15 сутый ерҙә баҡса үҫтерәләр, мал-тыуарын, ҡош-ҡортон аҫрайҙар. Хужалыҡты уңышлы алып барыу өсөн "Беларусь" тракторы һатып алғандар.
Зөлфәттең әсәһе Хәниә апай ҙа кесе улында, яратҡан киленендә йәшәүенә бик шат. 84 йәште ҡыуған апай һаман теремек, сос, ейәнсәрҙәренә һәр яҡлап ярҙамсы, кәңәшсе, балаларҙы тәрбиәләшергә лә өлгөрә.
Ирина менән Зөлфәт Ғайсиндар Иҫке Балтаста абруйлы һәм ихтирамлы ғаиләләрҙән һанала. Зөлфәт – умартасы, Ирина иһә район үҙәк дауаханаһында фельдшер булып эшләй. Ғаиләлә өс ҡыҙ бала үҫә: Сулпан II класта уҡый, Гүзәл – әҙерлек класына, ә Әлиә балалар баҡсаһына йөрөй.
– Башҡортостанда йәштәргә һәм яңы ғаилә ҡороусыларға республика етәкселеге һәм район хакимиәте тарафынан һәр саҡ иғтибар бүленә. Беҙҙең бер нисә дуҫ ғаилә лә республика программаһы сиктәрендә йортло булды, субсидия алды, – ти Ирина. Әле Ғайсиндар йәшәгән микрорайонда тотош йәш ғаиләләр урамы барлыҡҡа килгән.
Башҡортостанда йәштәрҙең киләсәге өмөтлө, эшләйем тиһәң, яратҡан эшең бар, өйлө булырға теләүселәргә Хөкүмәт һәр яҡлап ярҙам күрһәтә — тырышып эшләргә генә кәрәк.