“Имеҙеү бурысын тулыһынса үтәргә теләгән әсә балаһын күкрәк һөтө менән ике йыл туҡландырырға тейеш, – тиелгән изге “Ҡөрьән Кәрим”дә. – Атайҙарҙың иңендә иһә – туйҙырыу һәм кейендереү. Бер йән эйәһенә лә мөмкин булмаған эш йөкмәтелмәҫ”.

Тимәк, сабыйҙы күкрәк һөтө менән үҫтереү – Аллаһ Тәғә­ләнең ҡушыуы. Раббыбыҙ кемгә ниндәй аҙыҡ кәрәклеген белә.
Мәғлүм ки, сабыйҙың төрлө сиргә ҡаршы торған иммун системаһы ике йәшенә тиклем формалаша. Тап ошо ара­уыҡ­та кескәй организм фәҡәт әсә һөтөндәге файҙалы матдә­ләргә мохтажлыҡ кисерә. Имеҙеү туҡландырып ҡына ҡалмай, ә сабыйҙың хис-тойғо үҫешенә лә ыңғай йоғонто яһай. Бәләкәс үҙен хәстәр­ләү­ҙәрен, яратыуҙарын тойоп, уратып алған мөхиткә, яҡын­дарына тиҙерәк өйрәнә. Шул уҡ ваҡытта йоҡоһо тыныс була, сәбәпһеҙ илап-мыжып йонсотмай.
Имеҙеү балаға ғына түгел, әсәйгә лә ыңғай йоғонто яһай. Сабый тыуҙырған ҡатындың организмы тиҙерәк нығына, өҫтәүенә төрлө сиргә бирешеп бармай. Шул уҡ ваҡытта балаһын күкрәк һөтө менән туйындырған әсәнең күңеле бөтөн, йөҙө нурлы була. Тимәк, ғаиләлә лә күркәм мөнәсәбәт, татыулыҡ хөкөм һөрәсәк.
Әсә һөтө составындағы файҙалы матдәләр сабый үҫә барған һайын алышына, үҙгәрә бара. Ғөмүмән, бәләкәскә ни кәрәк, шуны еткереп тора. Мә­ҫә­лән, һөттәге глюкоза, майҙар – мейенең, кальций һөйәк­тәрҙең дөрөҫ үҫешенә йоғонто яһай. Мәғлүм ки, әҙәм балаһы иң нығы һыуға мохтажлыҡ кисерә. Ә уны эсереүҙең организмы нығынып етмәгән сабый өсөн зарарлы булыуы ихтимал. Был йәһәттән әсә һөтө ярҙамға килә: уның 90 проценты һыуҙан тора.
Белгестәр иҫбатлауынса, күкрәк һөтөндәге адипонектин, тәндә оҙаҡ йылдар һаҡланып, йөрәк сирҙәренә, инфарктҡа ҡаршы көрәшә икән. Уның аҙлығы йәки бөтөнләй булмауы иһә һимеҙлеккә, йөрәк-ҡан ауырыуҙарына килтерә.
Онкология клиникаларының береһендә үткәрелгән тәжрибә күкрәк һөтөнөң ракка ҡаршы тороу үҙенсәлегенә лә эйә­леген раҫлаған.