– Ике туған һеңлем кейәүгә сығырға әҙерләнеп йөрөй ине, ағаһы баҡыйлыҡҡа күсеп ҡуйҙы. Ни эшләргә, Нурмөхәмәт хәҙрәт? Никахты ҡасан үткәрергә: мәрхүмдең ҡырҡ көнө үткәсме, әллә йыллығын көтөргәме?

Ә. ҒАЙСИНА.
Стәрлетамаҡ районы.

Башҡортостан мосолмандарының Диниә назараты рәйесе мөфтөй Нурмөхәмәт хәҙрәт НИҒМӘТУЛЛИН:
– Бисмиллә­һир-рахмәнир-рахим!
“Ҡөрьән Кә­рим”­дә ғаилә тормошонда, йәшә­йеш барышында осрауы ихтимал төрлө хәл­дәр ха­ҡында бихисап аят-кәримә әйтел­гән. Донъя, әлбит­тә ки, шыма ғына юлдан бармай. Һәр әҙәм ба­лаһы­на төрлө яҙ­мыш насип ителә.
Ауырлыҡ – Ал­лаһ Тәғәләнең һы­науы. Ошоно онотмайынса, тормош имтиханын лайыҡлы үтергә ынтылыу зарур, хөрмәтле ҡәр­ҙәштәр. “Аллаһ Тәғәлә өсөн кем иң ҡәҙер­леһе?” – тип һорағандар мөьминдәр әмире Ғәли хәҙрәттән. “Хоҙай биргәнгә шөкөр ҡыла, бәлә, бәхетһеҙлек килгәндә сабыр итә белгән әҙәм балаһы”, – тигән имам. “Түҙемлек – әҙәм бала­һының иң мөһим сифаты”, – тип өйрәткән пәйғәмбәребеҙ Мөхәммәт ғәләйһис-сәләм дә. “Әгәр ҙә ҡолом тәненә, балаһына, малына килтерелгән бәләләргә түҙеп, хәлде сабырлыҡ менән кисерә белһә, Ҡиәмәт көнөндә уның ғәмәлдәре хаҡында хәтеренә төшөрөп, бизмәнгә һалып тороу Минең өсөн уңайһыҙ булыр”, – тигән һүҙҙәр бар “Ҡөрьән Кәрим”дә.
Тимәк, хөрмәтле ҡәрҙәштәр, тормошта ниндәй генә хәлдәр осрамаһын, түҙемле булырға кәрәк. Сабыр итеп, алға атлау зарур. Эйе, туғаныңды юғалтыу – оло ҡайғы. Әммә Аллаһ Тәғәләнең тәҡдиренә ҡаршы барыу мөмкин түгел. Йәшәргә кәрәк. Әҙәм балаһына бит ғүмер бер генә бирелә. Бәғзеләр, мәҫәлән, туҡһан йыл йәшәһә, икен­селәргә бер-ике көн генә бүленеүе мөмкин. Ошоно иҫтә тотоп, бүленгән ғүмерең эсендә изгелек, яҡшылыҡ ҡылып өлгөрөргә ынтылыу зарур.
Ҡөрьәндә әйтелгәнсә, әгәр ҙә ире вафат булһа, ҡатын-ҡыҙ дүрт ай ҙа ун көндән һуң яңы ғаилә ҡора ала. Ә инде ул ауырлы ҡалған икән, сабыйы донъяға килгәнсә башҡа иргә сығырға рөхсәт ителмәй. Артабан иһә мөмкин. Аллаһ Тәғәлә шулай ҡушҡан икән, тимәк, бында ниндәйҙер хикмәт бар. Был хөкөмдәр йылдар, быуаттар дауамында үҙгәрмәй. Яңынан-яңы хикмәттәре көндән-көн асыла килә.
Әлеге һорауҙа әйтелгәнсә, ағаһы йә башҡа ҡәрҙәше баҡыйлыҡҡа күсте икән, өйләнергә йәки кәләш алырға йыйынған туғаны ниәтен күпмелер ваҡытҡа тотҡарлап торорға тейеш тигән һүҙҙәр, ысынлап та, бар. Был – элек-электән килгән ғөрөф-ғәҙәт. Ә динебеҙҙә бындай ҡағиҙә юҡ. Ҡөрьәндең, пәйғәмбәребеҙ Мөхәммәт ғәләйһис-сәләмдең тәғлимәте буйынса, йәштәрҙе үҙ ваҡытында, тиҙерәк өйләндерергә кәрәк. Юғиһә аҙаҡ бөтөнләй икенсе хәлдәрҙең килеп тыуыуы, араға яман һүҙ инеүе, һөҙөмтәлә хатта бәғзеләрҙең яңғыҙлыҡҡа дусар булыуы ихтимал.
Аллаһ Тәғәлә һәммәбеҙгә лә ҡыҫҡа ғына ғүмеребеҙҙең ҡәҙерен белергә, шул арауыҡта әҙәмдең иң ҙур бурысын үтәргә – изгелек ҡылып өлгөрөргә – насип ҡылһын. Ир-ат ғаилә ҡорһон, йорт төҙөһөн, ағас ултыртһын, иманлы балалар үҫтерһен. Ҡатын-ҡыҙҙарыбыҙ ҙа үҙ бурыстарын үтәргә ынтылһын. Бер-беребеҙгә хөрмәт күр­һәтеп, йылы һүҙ, йылмайыу бүләк итеп, көндәребеҙҙе нурландырып йәшәйек, хөрмәтле ҡәрҙәштәр. Шул саҡта ғүмеребеҙ бәрәкәтле булыр, иншаллаһ. Әс-сәләмү ғәләйкүм үә рәхмәтуллаһи үә бәрәкәтүһ! Амин.