Башҡортостандың Силәбе өлкәһендәге даими вәкиллеге менән берлектә “Уралым” өлкә башҡорттары гәзите Бөйөк Еңеүҙең 70 йыллығына бағышлап китап сығарҙы. “Көньяҡ Урал башҡорттарының Бөйөк Ватан һуғышы тураһындағы хәтирәләре” тип аталған йыйынтыҡта етмеш яугирҙең һәм тыл хеҙмәткәренең ғүмер юлы бәйән ителә.

Баҫманы әҙерләүселәр тәү сиратта Уралдағы аҫаба халыҡ – башҡорттарҙың батырлығын яҡтыртыуҙы маҡсат итеп ала. Китапҡа ингән барлыҡ яугирҙәр — Силәбе өлкәһенән.
Ысынлап та, төбәк тарихында башҡорт ир-егеттәренең ҡаһар­манлығы аҙ яҡтыртылған. Әммә халыҡ хәтерендә уларҙың даны әле лә йәшәй. Мәҫәлән, ҡаланың үҙәк урамдарының береһе 1812 йылғы һуғышҡа китеүселәрҙең тупланыу урыны булған. Баш­ҡортостан Республикаһы­ның Силәбе өлкәһендәге даими вәкиллеге, Бөтә донъя баш­ҡорт­тары ҡоролтайы, Көньяҡ Урал яугирҙәренә арнап, һәйкәл асыуҙы ла планлаштырған. Әлегә өлкә һәм ҡала властары тарафынан ер бүленгән, кәрәкле документтар әҙерләнә.
Китапҡа ингән ветерандар­ҙың хәтирәләре башлыса милли юҫыҡта яҡтыртыла. Милләттәш­тәребеҙҙең күбеһе, башҡорттар һәр ваҡыт татыу, бер-береһенә ярҙам итәләр ине, бындай мөнә­сәбәт беҙгә дәһшәтле йылдар­ҙың ауырлығын еңергә ярҙам итте, тип халҡыбыҙҙың матур сифаттарын һыҙыҡ өҫтөнә ала.
Тыл хеҙмәтсәндәрен фронтта ҡатнашыусылар менән бер рәткә ҡуйыу осраҡлы түгел. Улар утлы өйөрмә эсендә йөрөмәһә лә, йылғанан тотҡан балығына тиклем яуға оҙатып торған. Эштән ҡайтҡас та, төн йоҡола­рын йоҡламай, һалдат­тарға ойоҡ-бейәләй бәйләгәндәр.
Башҡорт йәмәғәт ойош­ма­ларының ветерандарҙың ҡаһар­манлығын яҡтыртыуға арналған проекттарының һуңғыһы түгел был. Аяҙ күгебеҙ өсөн йәнен аямаған батырҙарыбыҙҙың исемдәрен данлау киләсәктә лә дауам итәсәк.