Байрам һайын үҙҙәренең моңло йырҙары менән район халҡын ҡыуандырған, күптәрҙең һөйөүен яуларға өлгөргән “Тамсылар” өлгөлө һәм “Сулпан” халыҡ вокаль ансамблдәре етәксеһе Роза Вахитова хаҡында хәйбуллалар тап шулай ти. Ә бит уның Хәйбулла далаларына эшкә килеүе лә осраҡлы була.
Стәрлетамаҡ ҡыҙы Роза Өфөлә сәнғәт институтын тамамлағас, кемдер уға Хәйбулла районына самолет оса, унда эшкә барһаң, ҡайтып йөрөүе еңел буласаҡ, тип әйтеп ысҡындыра. Ул саҡта баш ҡаланан Аҡъярға самолеттан башҡа транспорттың йөрөмәүен башына ла килтермәгән ул, күрәһең. Хәйбуллаға эшкә ебәреүҙәрен һорай. Ҡала мөхитендә тыуып үҫкән йәш ҡыҙҙың был аҙымына бер аҙ аптыраһалар ҙа, уҡыу йорто етәкселеге уның теләгенә ҡаршы килмәй. Шулай итеп, Роза Вахитова хеҙмәт юлын Аҡъяр музыка мәктәбендә башлай.
Йыраҡтан АН-24 самолетында осоп, эшкә килеүен килә ул, әммә йыш тыуған яҡтарына ҡайтырға мөмкинлек булмай. Бер аҙҙан һауа юлы ла ябыла, Сибай аша поезда Өфөгә барыу өсөн генә өсәр көнләп ваҡыт китә. Шул осорҙағы мәлдәрҙе иҫләп, йыр-моңға һөйөүем, эшемде яратыуым бар һағыныуҙарымды баҫҡандыр, күрәһең, ти Роза Рифҡәт ҡыҙы. Көндөҙ музыка мәктәбендә балалар менән шөғөлләнһә, кис район мәҙәниәт йортонда ололар менән мәж килә. Хәйбулла егете Талип Вахитов менән яҙмыштарын бәйләгәс, бөтөнләйгә был яҡтарҙа йәшәргә ҡала.
Юҡ, үкенмәй ул, киреһенсә, хәйбуллаларҙың киң күңелле, йыр-моңға бай булыуына һоҡланып йәшәй. Йырларға тип килгән бер баланы ла бороп сығармай, күңелен төшөрмәй, улар менән етди шөғөлләнә. Һөҙөмтәләр ҙә оҙаҡ көттөрмәй: уның тәрбиәләнеүселәре, вокаль ансамблдәр әленән-әле район, республика бәйгеләрендә, халыҡ-ара фестивалдәрҙә призлы урын яулай. Быйыл балаларҙың “Тамсылар” ансамбле ойошторолоуына — 10 йыл, “Сулпан” халыҡ вокаль ансамбленә 25 йыл тула. Әле улар ошо юбилейҙарҙы лайыҡлы ҡаршылау өсөн яңы йырҙар өйрәнә.
Ғаиләһе менән дә бәхетле Роза Рифҡәт ҡыҙы. Тормош иптәше менән сәскәләй өс ҡыҙ тәрбиәләп үҫтерә. Динара, Стәрлетамаҡта юғары белем алып, үҙ аллы тормош ҡорған. Уртансыһы Эльвира, әсәһенең бала саҡ хыялын тормошҡа ашырып, Санкт-Петербург ҡалаһында табиплыҡҡа уҡый. Кинйәләре Элина һигеҙенсе класта белем ала. Ҡыҙҙарҙың барыһы ла, музыка мәктәбен тамамлап, моңло йырлай, төрлө музыка ҡоралдарында ла уйнай. Ҡасандыр самолетта Хәйбулла далаларына эшкә килгән йәш ҡыҙ, бөгөн күңеленән ошо даланың матурлығына һоҡланып, моңло йырҙар ижад итә, ә тәрбиәләнеүселәре уларҙы бар тарафтарға осора.