Баҡтиһәң, кешегә оҡшаш роботтарҙы кинола, йәнһүрәттә генә түгел, үҙебеҙҙең ҡәҙимге тормошта ла күреп була икән. Республика башҡорт лицей-интернатында ойошторолған “Роболига-2016” фестивале тап ошо өлкә оҫталарын бергә йыйҙы, сағыу бер тамаша менән һоҡландырҙы.

Сарала һәләттәрҙе үҫтереү, балаларҙа робот техникаһы, программалау йүнәлештәренә ҡа­рата ҡыҙыҡһыныу тәрбиәләү маҡ­саты менән янған һәр кем ҡат­наша алды. Республи­ка­быҙ­ҙың төрлө ҡала һәм райондарынан, илдең башҡа төбәктәренән килгән командалар – йәмғеһе 166 уҡыу­сы – көс һынашты. Бәйгесе­ләрҙең күбеһе – Өфөнән, уның ҡарауы, Сибай, Бәләбәй, Нефтекама, Ишембай, Стәрлетамаҡ, Мәләүез ҡалаларынан, Әлшәй, Хәйбулла, Баймаҡ райондарынан килгән уҡыусылар ҙа оҫталыҡта ал бирерҙәй түгел. Бөрйәндең “Тимербатыр” командаһы ярыш­тарҙың күбеһендә призға лайыҡ булды.
Бәйгеселәр яһаған роботтар лабиринт буйлап йөрөнө, ма­неврҙар эшләне, хатта үҙ-ара футбол уйнаны... Әйтергә кәрәк, робот техникаһы менән шөғөл­ләнеү балаларға программалар яҙыуҙа ғына түгел, шул уҡ ва­ҡыт­та логиканы, образлы фе­керләүҙе, фантазияны үҫтереүҙә, физикалағы механика һәм статика кеүек бүлектәрҙе еңелерәк аңлауҙа булышлыҡ итә. Тағы ла төрлө конструкциялар төҙөргә һәм уларҙың ныҡлығын тик­шерергә, ҡуйылған мәсьәләләрҙе үҙаллы сисергә, командала эшләргә өйрәнәләр.
– “Роболига” фестиваленең киләсәге ҙур, сөнки унда ҡатнашыусыларға фекерләү, ижад итеү азатлығы бирелә, тема яғынан ғына сикләү бар. Балалар, үҙҙәренең фантазияһын, отҡорлоғон ҡулланып, төрлө роботтар төҙөй ала, – тине бәйгеләге “Фристайл” майҙаны судьяһы, Өфө дәүләт авиация техник университеты доценты, техник фәндәр кандидаты Николай Сенюшкин.
Республика башҡорт лицей-интернаты робот техникаһын үҫтереүҙә Башҡортостан уҡыу йорттары араһында беренсе­ләрҙән һанала. Әйткәндәй, халыҡ-ара “World Robot Olympiad” ярышының республика этабын да тап ошо лицей ойоштора.
– Бөгөн нанотехнология­лар­ҙың, робот техникаһының нимә икәнен белмәгән кешене табыу мөмкин түгел. Беҙ ҡулланған кеҫә телефондары, компьютерҙар, заводтарҙағы робот-машиналар – ошо өлкә емештәре. Улар көн­дән-көн тормошобоҙға тәрәнерәк үтеп инә. Киләсәк өсөн дә технология ҡаҙаныштары яуаплы кеүек. Милләттәштәребеҙ ара­һында ошо тармаҡта үҙен һыуҙағы балыҡтай хис иткән яҡшы белгестәр үҫтереү оло әһәмиәткә эйә, – ти Башҡорт­останда “Роболига” проектының етәксеһе Марат Әхмәтшин.
Бәйге тамам. Ундағы иң бәләкәй ҡатнашыусы – алты йәшлек Әмин Әхкәмов – “Фрис­тайл” майҙанында II урынды яуланы. Тимәк, ғилем туплау өсөн бер ҡасан да һуң йә иртә түгел.