Ошо көндәрҙә республика Башлығы Рөстәм Хәмитов һәм “Ростех” дәүләт корпорацияһына ингән авиация комплексы предприятиелары етәкселәре Өфөләге приборҙар һәм моторҙар эшләү берекмәләренең эшмәкәрлеге менән танышты.

Приборҙар эшләү берек­мәһенең башҡарма директоры Марат Бәдғет­ди­нов стратегик ойошмалар исем­легенә индерелгән пред­приятиеның авиация, йыһан тәғәйенләнешендәге, нефть һәм газ йүнәлешендәге продукция сығарыуға һәм хеҙ­мәтләндереүгә махсуслашыуы хаҡында һөйләне.
Рөстәм Хәмитов менән “Ростех”тың авиация комплексы предприятиелары етәкселәре ойошмала 2011 – 2020 йыл­дарға иҫәпләнгән “Рәсәй Федера­цияһының оборона-сәнәғәт комплексын үҫтереү” айырым маҡсатлы федераль программаһын тормошҡа ашырыу барышы менән танышты, авиация һәм йыһан техникаһын йыйыу цехында булды. Бында төрлө самолеттар, вертолет­тар өсөн авиация ҡорамал­дары, “Союз” һәм “Прогресс” кеүек йыһан караптары өсөн приборҙар етештерелә.
Артабан төбәк Башлығы пред­прия­тиеның хеҙмәт коллективы һәм профсоюз вә­кил­дәре менән осрашты. Унда берекмәне техник яҡ­тан ҡайтанан йыһазлан­ды­рыу, сығарылған продукция күләмен арттырыу мәсьәлә­ләре тикшерелде.
– Предприятиеғыҙ республика өсөн ғәйәт ҙур әһәмиәткә эйә, уның бай тарихы бар, – тине Рөстәм Зә­ки улы. – Әлбиттә, уның әүәл­ге данын тергеҙеү ха­ҡын­да хыялланаһығыҙҙыр. Былтыр был йүнәлештә эш башланды. Беҙ яңы­рыу юлына баҫтыҡ. Әлеге ҡаҙаныш­тар ҙа алға барыуыбыҙҙы сағылдыра.
Эш сәфәре артабан Мо­торҙар эшләү берекмәһендә дауам итте. Ул – “Хәрби авиа­ция өсөн двигателдәр” дивизио­нының төп пред­прия­тиеһы. Бында турбореактив авиация двигателдәре, газ һурҙырыу агрегаттары, вертолет двигателдәре өсөн деталдәр, газ-турбиналы энергетика өлкәһе өсөн продукция сығарыла һәм хеҙ­мәт­ләндерелә. Тауарҙың яртыһынан күберәге экс­портҡа китә.
Рөстәм Хәмитов “Ростех” дәүләт корпорацияһының авиация комплексы предприятиелары етәкселәре менән инженерлыҡ-етеш­тереү комплексында булды. Бында улар граждандар авиацияһы двигателдәрен эшләү технологиялары ме­нән танышты.