Башҡорт телендә “бурыс” “бур” һүҙе менән бер тамырҙан, кешенекен ваҡытлыса урлап тороу мәғәнәһен бирәлер, күрәһең. Иҡтисади көрсөк көсәйгән осорҙа был төшөнсә үҙе үк көнүҙәк мәсьәләгә әүерелеп китте. Хәҙер бурысҡа алған кеше түгел, ә биреп тороусы тыныс йоҡлай алмай, ти заман тыуҙырған лаҡап. Тик банк коллекторҙары “йоҡлай алмай” ятырға йыйынмауын асыҡ күрһәтә.

Заман шауҡымылыр инде: кемдән һораһаң да, банктан кредит алған. Барыһы ла етеш тормош теләй. Ал­дынғы илдәрҙә һәр кем кре­дитҡа йәшәй, имеш. Тик был реклама беҙҙә эш хаҡының һәм банк процент­тарының Европалағы кеүек булмауы тураһында ғына бер ни ҙә өндәшмәй. Ә киләсәкте белеп булмай. Һөҙөмтәлә муйындан бурысҡа батҡандар күбәйҙе. Башҡортостанда банктарға түләү ваҡытын уҙғарып ебәргән бурыс бөгөн йән башына 138 мең һумдан ашыу тәшкил итә. Ә бурысын ҡайта­ра алмаусыға бер көн килеп банк коллекторы менән осра­шырға ла насип була.
Дәүләт Йыйылышы – Ҡо­ролтайҙа ҡулланыу кредиттары буйынса бурысты ҡайта­рыу өлкәһендә тыуған хәлде анализлау буйынса эш төркөмө төҙөлгәйне, сөнки банк коллек­торҙарының бурыслыны ҡыҫымға алыуына зарланыусылар артты. Күптән түгел Президиум ултырышында был төркөм әҙерләгән мәғлүмәтте тикшерҙеләр.
– Анализ күрһәтеүенсә, ҡул­ланыу кредитын банкка кире ҡайтарыу тәртибе “Ҡул­ланыу кредиты (займы) тураһында”ғы Федераль закондың 15-се статьяһы менән генә билдәләнә. Уға ярашлы, барлыҡҡа килгән бурысты судһыҙ аша ҡайтарыу креди­торҙың ошо коллектор хеҙмәте менән килешеүе аша ғына тормошҡа ашырыла ала, – тине эш төркөмө етәксеһе, Дәүләт төҙөлөшө, хоҡуҡ тәртибе һәм суд мәсьәләләре буйынса комитет рәйесе Рәмил Хәкимов. – Ғәмәлдә иһә коллекторҙар лицензия­һыҙ эш итә, агентлыҡтары аккредитация үтмәй, уларҙың хеҙмәт үҙенсәлектәре стандартлаштырылмай. Һөҙөм­тәлә бер ниндәй рөхсәтһеҙ ойошторолған коллектор хеҙмәттәре лә күбәйҙе, улар хатта коммуналь бурыстарҙы түләттереүгә лә барып ҡы­ҫыла. Беҙ дәүләт яғынан коллектор хеҙмәтенә ҡарата күҙәтеү юҡ тигән һығымтаға килдек.
Дәүләт Йыйылышы – Ҡоролтай Рәйесе Константин Толкачев эш төркөмөнөң тик­шеренеү һөҙөмтәләре менән ҡәнәғәт булыуын һәм коллектор хеҙмәтендә тәртип булдырыу буйынса тәҡдимдәрҙең федераль закон сығарыу органдарына ебәреләсәген бел­дерҙе.