Йәш сырайлы, йор һүҙле, етеҙ, итә­ғәтле, ихлас күңелле, шул уҡ ва­ҡытта талапсан... Тап шундай булып хә­те­ребеҙҙә һаҡланыр Әмир ағай Фә­тихов. Күптән түгел йөҙ йәшен тул­тырған аҡһаҡалдың йәне ба­ҡыйлыҡҡа күсте...
Бер дәүерлек ғүмерендә ни генә кү­реп кисермәй Әмир Хәбиб улы! Крәҫ­тиән ғаилә­һендә өс ағаһы араһын­да үҫә ул. Бәләкәйҙән телдәрҙе өй­рәнеүгә әүәҫ булыуы К. Тимирязев исемендәге Баш­ҡорт дәүләт педагогия институтына алып килә. Артабан ир-уҙа­ман­ға Бөйөк Ватан һуғы­шын­да ҡатнашырға тура килә. Әйт­кәндәй, бер туған ағай­ҙа­ры­ның өсөһө лә яуҙа батыр­ҙарса һәләк була. Өлкән лейтенант Әмир Фәтихов иһә I, II дәрәжә Ватан һуғышы ордендары, миҙалдар менән бүләк­ләнеп, Тыуған иленә имен-аман әйләнеп ҡайта. Бөйөк Еңеүҙең 70 йыл­лығын ашҡынып көтөп алып, күҙ йәштәре менән үткәргәйне ул...
Яуҙан ҡайтҡас, йәнә уҡы­тыусылыҡ эшенә тотона Әмир Хәбиб улы. Аспирантурала белем алып, фән кандидаты дәрәжәһенә диссертация яҡлай. Артабанғы ғүмеренең күп өлөшөн Башҡорт дәүләт университетында студент­тарға тел үҙенсәлектәрен өйрәтеүгә бағышлай. Уҡыу йортонда һәр кем уны үҙ эшенә бирелгән ғилемле, ғәҙел, намыҫлы, тынғыһыҙ, гелән яңылыҡҡа ынтылған шәхес тип белде һәм киләсәктә лә шулай хәтерләр.
Әмир Хәбиб улы тормош­тоң һәр өлкәһе менән берҙәй ҡыҙыҡһынып йәшәне. Хаҡлы ялға сыҡҡас та ғүмерлек хеҙ­мәтенә әүе­релгән уҡытыу­сылыҡ эшенә тоғро ҡалып, ҡулынан ҡәләмен төшөрмәне. Респуб­ликабыҙҙың милли баҫмаларында уның мәғариф мәсьәләләренә, сәнғәт өлкәһенә, социаль темаларға яҙылған мәҡәләләре йыш донъя күрҙе. Уҡытыу­сылар ҙа остазға төрлө һорау менән даими мөрәжәғәт итте.
Байтаҡ йылдар элек ба­ҡыйлыҡҡа күскән ҡатыны Зөһрә Сәйфелмөлөк ҡыҙы менән өс бала үҫтерҙе Әмир ағай. Ул-ҡыҙҙары тормошта үҙ урынын табып, юғары дәрәжәләргә өлгәшеп, ата-әсәһенең изге юлын лайыҡлы дауам итә.
Тормошо башҡаларға ҙур өлгө булды. Гелән һоҡлан­дырып, хеҙмәт һөйөргә өйрәтеп, юғарыға әйҙәп йәшәне Әмир ағай. Гүрҙәре лә яҡты булһын.