Олоно оло итегеҙ,
Кәңәш алып йөрөгөҙ;
Кесене кесе, тиегеҙ,
Кәңәш биреп йөрөгөҙ,
– тигән хаҡ һүҙҙәр бар мәшһүр “Урал батыр” эпосында. Бер олоно, бер кесене тыңла тигән халыҡ аҡылына таянып, “Беҙ – Башҡортостан киләсәге!” тигән исем менән I Республика балалар ҡоролтайын уҙғарыу ҙа тап шул хәҡиҡәтте раҫлай. Рәми Ғарипов исемендәге 1-се башҡорт республика гимназия-интернаты ошо мәртәбәле йыйынға төрлө төбәктәрҙән һәләтле уҡыусыларҙы тупланы. Унда туған телде, милләтте һаҡлау, мәҙәниәтте үҫтереү мәсьәләләре күтәрелде.
— Сараны ойоштороуҙың әһәмиәте ҙур, сөнки был залға халҡыбыҙҙың киләсәге йыйыл­ған, – тине Башҡортос­тандың мәғариф министры урынбаҫары Венера Вәлиева. – Һеҙҙе борсо­ған мәсьә­ләләр буйынса фекер туплап, юғары даирәгә еткерергә тейешбеҙ. Ә инде балалар килә­сәк­тә лә халҡыбыҙ яҙмышына битараф булмаһын ине.
Бөтә донъя башҡорттары ҡоролтайы Башҡарма комитеты рәйесе урынба­ҫа­ры, “Киске Өфө” гәзитенең баш мөхәр­рире Гөл­фиә Янбаева иһә йәштәрҙең Ирек Зарипов, Сабир һәм Хәбир Сөләй­мәновтарҙан өлгө алып, юғары уңыш­тар­ға ынтылыуын теләне. Эйе, тап шун­дай үрҙәр яулаған замандаш­та­рыбыҙ Рә­сәй, хатта донъя кимәлендә милләтебеҙҙе таныта.
Уҡыусыларҙың сығыштары ла төптән уйланғанлығы, эшлекле тәҡ­димдәре менән күптәрҙе ҡы­ҙыҡ­һындырҙы. Мәҫә­лән, Бөр­йән районының Байназар мәк­тәбе уҡыусыһы Юлиә Мансурова Урал батырға һәйкәл ҡуйыу тәҡдиме менән сығыш яһаны.
– Башҡорттарҙың был эпосы кеүек ҡырғыҙҙарҙың “Манас”ы бар, – тине Юлиә. – Улар Манас­ты мәңгеләштереү йәһәтенән байтаҡ эш башҡарған. Ҡырғыҙ­станда һәйкәл ҡуйылған, хатта университет, аэропорт, илдең иң юғары ордены уның исемен йөрөтә. Бөрйәндә Урал батырға һәйкәл ҡуйыу – изге бурысыбыҙ.
Республика башҡорт лицей-интерна­тының Х класс уҡыусы­һы Азат Хоҙай­ғолов иһә туған телде киңерәк ҡулланыу мәсьә­лә­һенә туҡталды.
– Тиҫтерҙәрем араһында башҡорт те­ле­нең кәрәклеге хаҡындағы һүҙҙәрҙе йыш ише­тәм, – ти Азат. – Минеңсә, уның мәртәбәһен арттырыу йәһәтенән дәүләт кимәлендә яңы ҡарарҙар ҡабул итергә кәрәк. Әгәр Баш­ҡортостанда етәксе вазифаһын биләгән һәр түрә ике телде лә – башҡортса ла, урыҫса ла – мотлаҡ белергә тейеш тигән шарт ҡуйылһа, рухи ҡиммәте­беҙ­ҙең ҡулланыу даирәһе киңәйер ине.
“Башҡортса һөйләшеү йәштәр ара­һын­да модаға инергә тейеш” тигән шәп фекер ҙә яңғыраны кәңәшмәлә. Сара һөҙөмтәһе буйынса уҡыусылар резолюция ҡабул итеп, уны оло Ҡоролтайға юлланы.