Быйыл университет тамамлаған ҡыҙ мәктәптә нисек эшләй, ниҙәр генә уйлай икән? Бигерәк тә тыуған ерҙән ситтә, ят ҡалала... Унда башҡорт теле дәүләт теле булараҡ өйрәтелмәй, үҙе лә инглиз телен уҡыта.

Республикабыҙ мәктәптә­рен­дә төбәк компоненты ингән дә­рес­тәрҙең ҡыҫҡартылыуы ту­ра­­һында күп һөйләнелә, уҡытыусыларҙы һанға һуҡмау осраҡтары ла ишетелеп ҡала. М. Аҡмулла исемендәге Баш­ҡорт дәүләт педагогия универ­си­тетының башҡорт фи­ло­ло­­гия­­һы факультетын тамамлап, хеҙмәт юлын башлап ҡына торған Гөлсибәр Ғилма­нова иһә бөртөк тә зарланмай. Ул әле йәш, тиеүселәр булыр.
Төмәндең 22-се мәктәбендә уҡыусыларға башҡорт халҡы тураһында мәғлүмәт биреү, кү­ңелдәрендә милләтебеҙгә ҡара­та ихтирам тыуҙырыу өсөн айырым предметты уҡытыу мотлаҡ түгел, ти йәш белгес. Үҙе, инглиз теленән белем би­реүенә ҡарамаҫтан, мәктәптә уҙ­ған “Рәсәй халыҡтарының мә­ҙә­ниәте” фестивалендә ихлас ҡатнаша. Аҙнаның һәр көнө айырым милләткә арналған был байрамда Башҡортостандыҡын билдәләүҙе үҙ иңенә ал­ған Гөлсибәр. Милли кейем­дәрҙе әҙерләүҙә уҡыусыларҙың ата-әсәһе лә әүҙемлек күрһәт­һен өсөн әмәлен дә тапҡан. Тота ла Төмән мәктәбендә һабантуй ойоштора. “Башҡорт телендә һөйләшәм” тигән йыр, милли көйгә һалынған бейеүҙәр күҙҙәрҙә нур булып сағыла. “Аҡ тирәк, күк тирәк” уйыны бары­һын да берләштереү көсөнә эйә. Ата-әсә алып килгән бауыр­һаҡ, бәлеш, ҡымыҙ, бал һәм башҡа аҙыҡтарҙан һығы­лып тор­ған өҫтәл халҡыбыҙҙың ҡунаҡ­сыллығын таныта. Баш­ҡорт аты, ҡурай, тирмә хаҡын­дағы стена гәзите байрамдың милли йөҙөн билдәләй, халҡы­быҙҙың асылын тулыраҡ күҙ алдына баҫтырырға ярҙам итә.
1400 самаһы бала уҡыған мәктәптә бер үҙе ошондай күр­кәм сара ойоштора алған уңған ҡыҙ. Минән булмай, бында баш­ҡорт халҡынан яңғыҙым даһа, тип тормаған. Киләсәктә тыуған еренә ҡайтыу ниәтен дә әйтте Гөлсибәр. Бына бит, ил ҡыҙын­да ил хәстәре булһа, тауҙар аҡтарырға мөмкин!