Һуңғы ваҡытта халыҡ араһында Интернет-дарыуханалар популяр була бара. Тәү ҡарамаҡҡа бик уңайлы, әлбиттә. Ауырып-маҙар китһәң, урамға сығып йөрөйһө түгел, шылтыратып ҡына әйтһәң, һиңә кәрәген үҙҙәре үк... килтереп бирерҙәр ине лә, әгәр закон ҡушһа. Рәсәй Хөкүмәтенең ҡарарына ярашлы, бөгөн бындай дарыуханаларға препараттарҙы һатып алыусының өйөнә алып барып тапшырыу хеҙмәтен үтәү тыйыла. Хатта заявка ҡабул иткән осраҡта ла граждан дарыуҙарҙы мотлаҡ үҙе барып алырға тейеш. Әлеге лә баяғы бесәй-сысҡан уйыны кеүек килеп сыға инде.

Виртуаль дарыуханалар тәү сиратта персоналға хеҙмәт хаҡы түләмәүҙе, аренда өсөн өҫтәмә сығымдарҙы ҡыҫҡартыуҙы күҙ уңында тотоп ойошторола. Сығымдар әллә ни юғары булмағас, эшҡыуар дарыуға ла хаҡты самаһыҙ арттырмай. Ҡәҙимге дарыу­ханалар менән сағыштырғанда, Интернет аша яҙҙырып алған ҡайһы бер дарыуҙар хатта 30 процентҡа осһоҙораҡ килеп сыға. Ә бына сифатҡа килгәндә, бында инде уй­ланырға урын бар. Сөнки виртуаль дарыу­ханаларҙың эшмәкәрлеген бер орган да контролдә тотмай. Улар нин­дәй дарыуҙар менән һатыу итә, препа­раттарҙың сер­ти­фи­каттары бармы-юҡмы, эшҡыуар лицензия алғанмы, препараттар ҡайҙа һаҡ­лана?.. Статистика мәғлүмәт­тә­ренән күренеүенсә, бөгөн ялған дарыу­ҙарҙың 70 проценттан ашыуы нәҡ ошондай бер көнлөк дарыу­ханаларҙан “оса” ла инде.
Һорау: ҡәҙимге дарыуханаларҙа тауар­ҙың сифатын нимә гарантиялай? Пре­параттарҙың мотлаҡ сертификатланыуы һәм теркәлеүе, тәьмин ителештең асыҡ­лығы, төрлө күҙәтеү органдары тарафынан үткәрелгән даими тикшереүҙәр, лицензиялау процедураһы. Ошондай уҡ эшмәкәр­лекте виртуаль аптекала ҡулланыуға нимә ҡамасаулай һуң? Үрҙә телгә алған барлыҡ шарттарҙы ла үтәргә була, әммә Интернет-дарыуханаларҙың эшен көйләүсе закон юҡ. Бәлки, бөгөн тормошобоҙ көндән-көн виртуаль донъяға бәйләнә барғанда депутаттарға был мәсьәләне лә төптән өйрәнергә ваҡыттыр? Һеҙ нисек уйлайһығыҙ, хөрмәтле гәзит уҡыу­сылар? Закон менән гарантия­ланған осраҡта Интернет-дарыу­ханаларҙың хеҙмә­тенән файҙа­ланыр инегеҙме?