Мораҡай, Туйыш, Байым, Рәхмәт, Яңы Балапан ауылдарының ағинәйҙәре Мораҡай мәсетендә халыҡ өсөн күркәм дини байрам уҙғарҙы. Ҡунаҡтарҙы иман йортонда милли ризыҡтар менән ҡаршыланылар.

Байрамды асып, имам-ха­тип Даян Фәтхуллин Ҡөрь­ән аяттары уҡыны, вә­ғәз һөйләне. Халыҡ унан үҙен ҡыҙыҡһындырған һо­рау­ҙарға яуап алды.
Ҡунаҡтар артабан мәсет билә­мәһендә урынлашҡан мәҙрәсә, ашхана, ҡунаҡ­ха­на менән танышып сығып, сикһеҙ һоҡланыуын бел­дерҙе. Ысынлап та, хайран ҡалмалы шул: ауыл халҡының динле булыуы, ғи­лемгә, татыулыҡҡа ынтылыуы һәр урында асыҡ сағыла. Бында, әлбиттә, имам-хатиптың өлөшө баһалап бөткөһөҙ.
Байрамда ауылдағы йәш ғаилә башлығы Рус­лан Әхмәҙиндең ҡорбан салдырып, халыҡты һый­лауы айырым иғтибарға лайыҡ. Тимәк, йәштәребеҙ ышаныслы, улар төйәктең, милләттең киләсәген һаҡлаясаҡ, иншаллаһ.
Осрашыуҙа беҙ ҙә, Маг­ни­­тогорск ҡалаһындағы ”Урал ынйылары” яҙыу­сы­лар ойошмаһы вәкил­дәре, үҙебеҙҙе иң ҡәҙерле ҡу­наҡ­тар итеп тойҙоҡ. Ара­быҙ­ҙан Клара Шәм­­сетдинова мөнәжәттәр әйтте, мин иһә “Ожмах асҡысы” тигән китабымдан динебеҙгә ҡа­ғылышлы шиғыр­ҙарымды уҡып ишеттерҙем. Халыҡ билдәле әҙип Мәүлит Ямалетдиновтың “Ҡөрьән – шиғри тәржемәләр” тигән китабын ҡулдан-ҡулға йөрөтөп ҡараны, уны ҡайҙа һатып алыу мөмкинлеге менән ҡыҙыҡһынды.
Байрам ашҡа, башҡа­рыл­ған изге эштәргә ба­ғышлап аят уҡыу, өйлә на­маҙы менән тамамланды.