Ҡалабыҙҙа өс көнгә күп фатирлы өс йорттоң газын һүндергәндәр. Сәбәбе ябай — “зәңгәр яғыулыҡ” өсөн түләмәгәндәр. “Потенциал” идаралыҡ компанияһына күп фатирлы 13 йорт ҡарай. Әлеге өсәүһендә йәшәгәндәр газ буйынса ҙур бурысҡа батҡан. Күңелһеҙ хәл шул арҡала килеп сыҡҡан да инде. Йәмғеһе 93 мең һум бурыс йыйылған. Ҡала прокуратураһы идара­лыҡ компанияһынан аҡса тү­ләү­ҙе талап иткән. Әлеге ва­ҡыт­та бурыс ҡапланған һәм йорттарҙа йәшәүселәр йәнә ашарға газда бешерә башлаған.
Әлбиттә, был йорттарҙа һәр фатир хужаһы газ буйынса бу­рысҡа батҡан, тип әйтеп булмай. Уның ҡарауы, ғәмәлдә иғәнәләрен, һалымдарын, коммуналь сығымдарын ваҡы­тын­да түләп барған намыҫлы граж­дандар яуапһыҙҙар арҡа­һында газ-һыу-электр­һыҙ ул­тырырға мәжбүр. Кем ғәйепле, кем хаҡлы икәнлеген шунда уҡ билдәләп тә булмай. Түләүҙән ҡасыусыларҙы ғәйепләргәме, әллә идаралыҡ компания­һынмы — бел­мәҫһең. Шулай ҙа беткә үс итеп тунды утҡа ла яғырға ярамай. Йүнһеҙ күршеһе арҡаһында бер кем дә өшөп тә, ас та ултырырға тейеш түгел. Проб­леманы нисек хәл итергә? Хәтерләй­һегеҙҙер, Торлаҡ-коммуналь хужа­лыҡ­ты үҙгәртеп ҡороуға булыш­лыҡ итеү фон­дының Күҙәтеү советы рәйесе Сергей Степашин Стәрлета­маҡ­та март айында үткән “Тор­лаҡ өлкәһендә хоҡуҡи көйләү проблемалары” Бөтә Рәсәй конференцияһында торлаҡ-коммуналь түләүҙәр буйынса хоҡуҡи күренештең аҡһағанын белдергәйне. Хәйер, ил хөкүмәтенең элекке рәйесе шул уҡ сарала белдереүенсә, бурыстар һәм башҡа мәсьәләләрҙе көйләү өлкәһендә был етеш­һеҙлектәрҙе бөтөрөү буйынса эш алып барыла.
Башҡортостан Башлығы Рөс­тәм Хә­митов белдереүенсә, 1 июнгә ҡарата республикала торлаҡ-коммуналь ху­жа­лыҡ өлкәһендәге түләүҙәр буйынса йыйылған бурыс 4 миллиард 160 миллион һум тәшкил иткән. Йыл эсендә ул 1,5 миллиард һумға артҡан.
— Әлбиттә, иҡтисади көрсөк һәм башҡа сәбәптәр арҡаһында түләүҙәр ваҡытында килеп етмәй йә иһә бөтөн­ләй баш­ҡа­рыл­май. Уның ҡарауы, был проб­лема үҙ сиратында күп ауырлыҡ тыуҙыра, — тине ул саҡта Рөстәм Зәки улы.
Мәҫәлән, көҙгө-ҡышҡы миҙ­гел­гә әҙерлек эштәре башҡа­рылғанда ла, ҡорамалдарҙы ал­маштырыу йәһә­те­нән дә, шу­лай уҡ ремонтты ваҡы­тында үтәү буйынса ла ҡапланмаған бурыс аяҡ сала. Түләмәүселәр араһында хужалыҡ-предприятие һәм ойошмалар ҙа, шәхси ҡулланыу­сылар ҙа күп.
Эйе, тәртәнән бер сыҡҡан проблема сылбыр буйынса китә лә китә. Шуның өсөн түләүҙәрҙе ваҡытында башҡарып барыу зарур. Әлбиттә, бурыс та буш урында барлыҡҡа килмәй, яуапһыҙҙар менән бер рәттән, мохтажлыҡ кисергән граждандар арҡаһында ла үҫә ул. Быныһы ла уйландырмай ҡалмай...