Бала саҡта “диктант” һүҙенән йөрәк “жыу” итеп ҡала торғайны. Әле Башҡортостанға беренсе тапҡыр “Бөтөн Рәсәй географик диктанты” киләсәге тураһында ишеткәс, күңел елкенеп ҡуйҙы. Бәй, килһен! Халҡыбыҙ белемен “бизмәнгә” һалып ҡарар, башҡа төбәктәр менән көсөн самалар.

Рәсәй Президенты Владимир Путин тарафынан тәҡдим ителгән “Минең илем – Рәсәй” диктанты М. Аҡ­мулла исемендәге Башҡорт дәүләт педагогия универ­си­те­ты­ның 202-се, 206-сы ауди­то­рия­һында һәм Башҡорт дәүләт уни­верситетының география факультетындағы 01-се, 02-се аудиторияларҙа үтәсәк. Әбйәлил, Ишембай, Архангел, Баҡалы һәм башҡа райондарҙың “географ”тары бәйгелә ҡатна­шырға теләк белдергән. 200-ҙән ашыу кеше ҡәләмен ослап ҡуйған да инде.
Диктанттың тексында өс өлөш­тән торған 25 һорау буласаҡ. Беренсеһе – географик атамалар, терминдар, икенсеһе – карталағы географик объекттар, өсөнсөһө иһә – Рәсәй төбәктәре һүрәтләнгән нәфис әҙәбиәт аша географик атамаларҙы билдәләү.
Эштәрҙе тикшереүҙә ғалимдар, география уҡытыусы­лары ҡатнашасаҡ. Һөҙөмтәләрҙе 10 декабрҙә Рус география йәмғиәтенең сайтынан ҡарап, шулай уҡ 8-917-340-54-40 йәки 8-960-804-56-20 телефондарына шылтыратып белергә мөмкин.
Рус география йәмғиәтенең Башҡортостан буйынса төбәк бүлексәһе рәйесе Камил Йы­һаншин әйтеүенсә, республикабыҙҙа еңеүсе­ләргә ҡиммәтле бүләктәр биреләсәк.
Диктант иртәгә сәғәт 12-лә башлана.
Шулай итеп, бәйгегә, дуҫтар, бәйгегә! Ҡәлә­мегеҙ осло, зиһенегеҙ аяҙ булһын!