Бөтә Рәсәй фән фестивале уңайынан Өфөлә бик күп ғилми саралар булды. Мифтахетдин Аҡмулла исемендәге Башҡорт дәүләт педагогия университеты ла унан ситтә ҡалманы. Фән һәм техника өлкәһендәге республика дәүләт йәштәр премияһы лауреаты, Башҡортостандың мәғариф отличнигы, башҡорт филологияһы факультеты деканы, профессор Луиза Хәмзә ҡыҙы Сәмситованың “Башҡорт тел картинаһында мәҙәниәт концепттары” монографияһының исем туйы үтте.
Луиза Сәмситова – лин­гво­куль­турология, когнитив лин­гвис­тика, грамматика өл­­кә­һен­дә бик әүҙем эшләгән ға­лим, 150-нән ашыу фән­ни-методик хеҙмәт авторы. Улар­ҙың араһында һүҙлектәр, монографиялар, уҡыу әсбап­тары һәм башҡа китаптар бар.
Кисәгә абруйлы ҡунаҡтар йы­йылды. Педагогия фәндәре док­торы, профессор Лена Сә­йәхова, башҡорт фило­логияһы факультетының 1996 йылғы сы­ғарылыш студенты, филология фәндәре докторы, профессор, Истанбул уни­вер­ситетының Евразия инс­титуты директоры урын­ба­ҫары Исмәт Бинәр, тәж­рибәле педагог-методистар, педагогия фәндәре кандидаттары, про­фессорҙар Әхмәр Аҙ­набаев һәм Рәшит Әлмө­хә­мәтов һәм башҡа ға­лим­дар, бер тауыштан монографияны хуплап, был ғил­ми эште бик кәрәк тип тап­ты, сөнки бөгөн лингвокультурология проблемаһы иң төп һәм мөһим проблемаларҙың береһе һа­нала. Ул — башҡорт тел ғиле­мендә яңы йүнәлеш. Халыҡтың мәҙәниәтен, тарихын, психоло­гияһын, фило­со­фияһын, аңын, рухын, мен­та­литетын тел ме­нән бәй­ләп тикшереү халыҡты төрлө яҡтан үҫтерә генә. Быныһы инде бик ҡыуаныслы. Луиза Хәмзә ҡыҙы үҙ эҙләнеү­ҙәрендә башҡорт прозаһын, фольклорын, поэзияһын лингвокультурологик йүнәлештә ентекләп өйрәнә һәм шуның менән башҡорт телен үҫте­реүгә тос өлөш индерә.
Әйткәндәй, Луиза Сәмси­то­ва – бар яҡтан да өлгөр кеше. Ул, факультеттың эшен алып барыуҙан тыш, фән ме­нән ныҡлап шөғөлләнә, спорттан да ситтә ҡалмай, уның аспи­ранттары, магистранттары әленән-әле маҡтаулы исем­дәргә, грант­тарға лайыҡ булып тора. Уҡытыусыбыҙ йәмәғәт эшендә лә ҡайнап йәшәй. Бик талапсан, шул уҡ ваҡытта кешелекле, рухлы, эшһөйәр, мәр­хәмәтле, заман менән бергә атлаусы, һәр ваҡыт ярҙам ҡулы һуҙырға әҙер торған, күптәргә өлгө булырлыҡ шәхес ул.
Луиза Сәмситова Бөтә донъя башҡорттары ҡорол­та­йы тарафынан “Ал да нур сәс хал­ҡыңа” миҙалы менән бүләк­ләнде. Был шатлыҡлы ваҡиға сараға йәм өҫтәне.